د افغان سولې په تړاو د امریکا، روسیې او افغانستان د استازو ترمنځ درې اړخیزه ویډیويي غونډه شوې ده. په همدې تړاو په خپره شوې اعلامیه کې ویل شوي چې ټول لوري دې د بین الافغاني خبرو د پیل لپاره چټکې هڅې وکړي. په دې غونډه کې د افغانستان په استازیتوب حنیف اتمر، د امریکا په استازیتوب زلمي خلیلزاد او د روسیې په استازیتوب ضمیر کابلوف برخه اخیستې وه. په اعلامیه کې د بندیانو د خلاصون هرکلی شوی او ویل شوي چې نور بندیان دې هم خلاص شي. دغه راز له طالبانو هم غوښتل شوي چې د بین الافغاني خبرو له پیل وړاندې تاوتریخوالی کم کړي.
له بین الافغاني خبرو سره هممهاله او تر هغه وړاندې د افغانستان په تړاو د سیمې او د نړۍ د سترو هېوادونو ترمنځ همغږي، ګډ کار او توافق د افغان سولې لپاره حیاتي ارزښت لري. د افغانستان په لانجه کې ښکېل اړخونه له همدغو سیمه ییزو او نړیوالو قدرتونو سره اړیکې لري او د دوی دریځ مخامخ د سولې پر پروسه اغېز پرې باسي. که دوی ټول توافق ولري او د روانې پروسې ملاتړ وکړي، نو نه یوازې ژر به بین الافغاني خبرې پیل شي، بلکې بریالۍ به هم شي. که دغه هېوادونه د توافق او همکارۍ پر ځای په افغانستان کې د ټکر تګلارې ولري، نو بیا طبیعي ده چې زموږ د سولې روانه پروسه به له سختو خنډونو سره مخ وي او آن بریا یې ناشونې کېږي. له همدې امله دا ډېره مهمه ده چې امریکا او د سیمې هېوادونه په افغانستان کې د سولې په اړه توافق ولري او ګډ کار وکړي.
خو په دې چاره کې یوه مسأله مهمه ده او هغه دا چې د سولې په پروسه کې چې څه ډول ټول کورني اړخونه باید دخیل شي او رضایت یې تر لاسه شي، دغسې باید د افغان سولې په تړاو په سیمه ییزه اجماع کې ټول هغه سیمه ییز هېوادونه او ګاونډیان چې د افغانستان پر حالاتو اغېز لري، ښکېل شي. د افغان سولې په تړاو امریکا او پاکستان په ژوره معامله کې دي، تر دې چې ځینې اندېښنې یې هم را پورته کړي، خو ایران بیا یو مخ هېر شوی دی، چې پکار ده هېر نه شي. دغه راز هند لا هم ناراضه ښکاري. روسیه او د منځنۍ اسیا هېوادونه بیا د سولې روانې پروسې ته ورګډ شوي او یا هم ترې راضي ښکاري چې دا یو مهم پرمختګ دی. چین هم تر ډېره راضي ښکاري. له همدې امله مهم اړخونه راضي شوي چې دا ښه ګام دی، خو هغه هېوادونه هم باید قانع شي چې تر اوسه پورې له دې پروسې سره پټ او ښکاره مخالفت کوي او ترې منزوي دي.
د مسکو، واشنګټن او کابل د درې اړخیزې غونډې د دوام ژمنه شوې ده. پکار ده چې همداسې غونډې زیاتې شي، له نورو هېوادونو سره هم له نږدې کار وشي، څو ټول شته خنډونه او اختلافات ختم شي. د سیمې هېوادونه او د نړۍ ستر قدرتونه ټول باید په افغانستان کې د ټکر پر ځای، همکارۍ، سولې او ګډ کار ته وهڅول شي او همدا چاره زموږ سره په واقعي سوله کې مرسته کوي.
