د هلمند په سنګین ولسوالۍ کې پر دودیزه مېله توغندويز برید شوی، چې ۲۳ کسان یې وژلي او لسګونه نور یې ټپیان کړي دي. حکومت دا کار د طالبانو ګڼي، خو طالبان دا د امنیتي ځواکونو د هاوان برید ګڼي. سیمه ییز خلک وايي چې نه پوهېږي برید چا کړی، خو په سیمه کې نه طالبان او نه هم حکومتي کسان وو. په ټولنیزو رسنیو کې د برید خپاره شوي تصویرونه ښيي چې څه ډول انسانان ټوټه شوي او خلک په وینو سره دي.
دا په واقعي مانا یو وحشیانه برید و، چې پکې په قصدي او شعوري ډول ملکي وګړي په نښه شوي دي. د یوه او بل ملامتولو خبره که پرېږدو، څوک چې پر خدای باور ولري، په انسان او افغان یې زړه درد وکړي، دغه ډول وحشت نه شي کولی. دا ډول پېښې ښيي چې په جګړه کې څومره وحشي، ظالم او د افغان انسان دښمن خلک شته. دا سمه ده چې ښايي ملکي خلک ثابت نه شي کړلی چې قاتل یې څوک دی، خو وحشي انسانان به له خدای تعالی سره مخ کېږي او بیا به هلته د پټولو هېڅ توان ونه لري.
برید په داسې حال کې شوی چې د امریکا او طالبانو ترمنځ سوله شوې او ژر باید بین الافغاني خبرې پیل شي. د بین الافغاني خبرو موخه واضح ده، د افغانانو وینې باید خوندي شي، طالب، امنیتي ځواکونه او ملکي وګړي ټول افغانان دي. د بین الافغاني خبرو او سولې موخه همدا ده چې دا ټول امن شي او افغان انسان باعزته شي. موږ دغه حالت ته روان یو، چې یو بل ته امن ورکړو، یو بل ومنو، پر ګډو ټکو توافق وکړو. که د جګړې په دواړو لورو کې سر له اوسه همدا احساس پیدا شي چې مقابل اړخ یې ورور دی، سبا ورسره خبرې کوي، توافق کوي، یو بل ته امن ورکوي او ګډ راتلونکی جوړوو، نو باید سر له اوسه باید دښمني او جګړه ودروو. زموږ زړونه باید یو بل ته له دومره کرکې ډک نه وي، موږ باید له خپلو زړونو کرکې وباسو او سر له اوسه باید یو بل ته لاسونه ورکړو.
دا سمه ده چې ځیني بریدونه به مبهم وي، خو هر څوک چې د سولې پر وړاندې خنډونه جوړوي، خلک پوهیږي چې هغوی دا ډول بریدونه هم کولی شي. د بندیانو په خوشې کولو کې ځنډ په واضح ډول د سولې پر وړاندې خنډ جوړول دي. که حکومت رښتیا سوله غواړي، نور باید پلمې بندې کړي او پاتې زندانیان خوشې کړي. له بله اړخه جګړه، وژنې او بریدونه په واضح ډول د سولې پر وړاندې خنډ جوړول دي. طالبان چې سبا سوله کوي، خو سر له ننه دې پر خپل افغان ورور رحم وکړي، جګړه دې ودروي او د سولې په اړه دې ذهنیتونه او باورونه نه خرابوي.
که څوک له خپلو خلکو سره مینه لري، پر خپل ولس رحم کوي، د افغانیت او اسلامیت ادعا کوي، نو پکار ده چې په عمل کې یې ثابت کړي. په عمل کې یې ثابتول د سولې پر وړاندې د خنډونو په لرې کولو، پر خپل ورور په رحم کولو، انعطاف او د سولې په لاره کې په قربانۍ کې څرګندیږي.
