په اروزګان کې د نښتې پر مهال په دغه ولايت کې د سيمه ييزو پوليسو پخوانى قوماندان حکيم شجاعي ټپي او مرستيال يې له ٢٠ نورو کسانو سره وژل شوى دى.
ځايي امنيتي سرچينې وايي چې دا پېښه وړمه ورځ د دغه ولايت د خاص اروزګان ولسوالۍ په حسيني کلي کې رامنځته شوې ده.
د خاص اروزګان ولسوالۍ يوه قومي مشر د نوم نه ښودو په شرط رسنيو ته ويلي چې دا نښته د يوې ښځې پر سر رامنځته شوې ده.
سرچينې زياته کړې چې د ولسوالۍ له کُندلان کلي څخه يوه ښځه د حسيني کلي ته تښتېدلې وه، کله چې د کندلان کلي مشران حسيني کلي ته ورځي؛ نو هغوى پرې بريد کوي.
دغه اوسېدونکى وايي چې هلته د دواړو لورو ترمنځ سخته نښته کېږي چې له امله يې دواړو لورو ته مرګ ژوبله اوړي.
د اروزګان والي اسدالله سعيد هم په خاص اروزګان ولسوالۍ کې ياده نښته او له امله يې اوښتې مرګ ژوبله تاييد کړې، خو په دې اړه يې د جزياتو له ورکړې ډډه کړې ده.
سعيد پژواک ته ويلي چې په خاص اروزګان ولسوالۍ کې مخابراتي شبکې سم کار نه کوي؛ ځکه خو دوى د پېښې په تړاو بشپړ معلومات نه دي ترلاسه کړي.
د اروزګان يوې امنيتي سرچينې پژواک ته ويلي چې وسله والو طالبانو په خاص اروزګان ولسوالۍ کې بريد کړى چې د نښتې پر مهال د ښځو او ماشومانو په ګډون ٢٠ کسان پکې وژل شوي دي.
يادې سرچينې چې د نوم له څرګندولو يې ډډه کوله، زياته کړې چې په وژل شويو کسانو کې د يادې ولسوالۍ د سيمه ييزو پوليسو د پخواني قوماندان حکيم شجاعي مرستيال هم شامل دى او په خپله شجاعي ټپي شوى دى.
دې امنيتي سرچينې له حکومته غوښتي چې خاص اروزګان ولسوالۍ ته بېړنۍ مرسته ولېږي، ځکه په وينا يې چې سيمه د سقوط له ګواښ سره مخ ده.
د طالبانو وياند قاري يوسف احمدي رسنيو ته په يوه لېږلې پيغام کې ويلي چې د قوماندان شجاعي وسله والو پر دوى بريدونه کړي وو چې په ځوابي بريد کې يې د قوماندان اتو کسانو ته مرګ ژوبله اړولې ده.
هغه زياته کړې چې په دې نښته کې د شجاعي اتو کسانو ته مرګ ژوبله اوښتې او د يوې ښځې په ګډون شپږ کسان يې ژوندي نيول شوي دي.
قوماندان شجاعي پنځه کاله مخکې په ياده ولسوالۍ کې د ملکي وګړو پر وژلو، ځورولو او ربړولو تورن شوى وچې کورنيو چارو وزارت د هغه د نيولو امر هم کړى و، خو په کابل کې د ځينو سياسي مشرانو له خوا د هغه د ملاتړ له امله دغه کار ونه شو.
