د غزني د ولايتي شورا مرستيال وايي چې د دغه ولايت د اتو ولسواليو بشپړ کنټرول له وسله والو طالبانو سره دى او د پنځو نورو يې بيا يوازې مرکزونه د حکومت په لاس کې دي.
د غزني د ولايتي شورا مرستيال امان الله کامراني وايي چې په سقوط شويو ولسواليو کې رشيدان، خواجه عمري، زنخان، جغتو، اجرستان، خوږياڼي، ده يک او واغظ شامل دي.
د کامراني د معلوماتو له مخې، د اندړو، قره باغ، ګيرو، ګيلان او اب بند ولسواليو بيا يوازې مرکزونه له حکومت سره دي.
ده ويلي چې جاغوري، مالستان او ناهور ولسوالۍ امنې دي خو لويې لارې يې بيا د طالبانو په کنټرول کې دي.
کامراني زياته کړې: «که حکومت د غزني امنيت ته جدي پاملرنه ونه کړي، نو کېداى شي چې يو ځل بيا له سقوط سره مخ شي».
دغه راز د قره باغ ولسوالۍ اوسېدونکي رحمت الله پژواک ته ويلي چې له څو مياشتو راهيسې دا ولسوالۍ د طالبانو له لوري کلابنده ده.
هغه وايي چې طالبانو د کندهار-کابل لويه لار هم د غزني په قره باغ، اب بند او مقر ولسواليو کې تړلې ده.
ده زياته کړې: «زموږ د ولسوالۍ شاوخوا ته طالبان پراته دي، څو ځلې کومکي ځواکونه هم راغلل خو ولسوالۍ کې دننه پراته دي او تر اوسه نه دي وتلي».
همدارنګه د غزني- کندهار لويې لارې يوه موټر چلوونکي سميع الله پژواک ته ويلي چې طالبانو پر دې لويه لار څو ځايه چک پاينټونه جوړ کړي دي.
دى وايي: «څو ځايه پلچکونه هم خراب شوي، موږ مجبور يو چې په خامه لارو تګ راتګ وکړو».
د دغه ولايت يو شمېر نورو اوسېدونکو هم ورته څرګندونې کړې دي.
د غزني والي وحيدالله کليمزی وايي چې په دې وروستيو کې په دغه ولايت کې امنيتي وضعيت خراب شوى دى.
والي زياته کړې چې په غزني کې د امنيت د ټينګښت په موخه يې له امنيتي ځواکونو سره يوځاى هلې ځلې پيل کړې دي.
دغه راز د غزني امنيه قوماندان مل پاسوال غلام داوود تره خيل پژواک ته ويلي چې د دغه ولايت د لويو لارو د امنيت د ټينګښت په موخه يې عمليات پيل کړي دي.
هغه وايي: «په لويو لارو کې به پوستي جوړې کړو او زموږ د کومانډو ځواکونو په چاپو کې ګڼو طالبانو ته مرګ ژوبله هم اوښتې ده».
قوماندان د ولسواليو د سقوط په اړه څه نه دي ويلي خو زياته کړې يې ده چې هغو ولسواليو ته به ډېره توجه وکړي چې دا مهال يې امنيت له سختو ګواښونو سره مخ دى.
وسله والو طالبانو تر اوسه په دې اړه څه نه دي ويلي خو تر دې وړاندې د طالبانو وياند ذبيح الله مجاهد پژواک ته ويلي وو چې د غزني ولايت ډېرې سيمې له طالبانو سره دي.
شاوخوا درې مياشتې وړاندې وسله والو طالبانو په غزني ښار بريد وکړ چې له څو مهمو دولتي ادارو پرته يې نورې ټولې سيمې ونيولې.
