د يوې نظرپوښتنې پايلو ښودلې چې افغانان د نړۍ تر ټولو نهيلي خلک دي او دغه راز يې راتلونکې ته هيلې ورځ تر بلې کمېږي.
دا نظرپوښتنه چې د ګال اب بنسټ له لوري د نړۍ په ۱۶۰ هېوادونو کې شوې او په پايله کې يې ويل شوي چې د مناسبو روغتيايي او تحصيلي خدمتونو نشتوالی او امنيتي ستونزې د افغانانو د نهيلۍ لوی لاملونه دي.
د ياد بنسټ د موندنو پر بنسټ، هغه نومرې چې افغانانو د خپل ژوندانه وضعيت ته ورکړې، د نړۍ د نورو ټولو هېوادونو د وګړو په پرتله کمې دي.
افغانانو د دې پوښتنې په ځواب کې چې د خپل ژوند کيفيت ته له لسو څو نومرې ورکوي، په اوسط ډول ۲.۷ نومرې ورکړې دي.
دا په داسې حال کې ده چې افغانانو په ۲۰۱۶ کال کې د ياد بنسټ په ورته نظرپوښتنه کې د خپل ژوندانه وضعيت ته ۴.۲ نومرې ورکړې وې. د نظرپوښتنې له پايلو ښکاري چې افغانان له خپل راتلونکي ورځ تر بلې نهيلي شوي دي.
هغه کسان چې په نظرپوښتنه کې يې ګډون کړی د ۳/۲ برخې عمرونه يې تر ۳۵ کلونو کم دي.
د پوښتل شويو يوازې ۳۶ سلنه برخې ويلي چې د ورځې په اوږدو کې يې خندلي، په داسې حال کې چې په ۲۰۱۶ کال کې بيا ۵۲ سلنه خلکو ويلي وو چې د ورځې يې خندلي دي.
۵۷ سلنه پوښتل شويو ويلي چې په تېرو کلونو کې يې د خوراکي موادو د موندلو لپاره کافي پيسې نه درلودې او ۵۰ سلنه نورو بيا ويلي چې د سرپناه د برابرولو جوګه نه دي.
د نظرپوښتنې په پايلو کې دا هم په ډاګه شوې چې هېڅ افغان په لنډمهال کې د خپل ژوندانه د وضعيت د ښه کېدو هيله نه لري. يوازې ۴ سلنه افغانانو ويلي چې ژوند يې پر مخ روان دی او اووه سلنه نورو بيا ويلي چې دا څو کاله يې په ژوند کې هېڅ بدلون نه دی راغلی.
