د ولسي جرګې ريیس او ځينې غړي وايي چې ټاکنيز کمېسيونونه دې د ټاکنو د روڼتيا لپاره پر شويو هوکړو عمل وکړي.
دا په داسې حال کې ده چې د ټاکنيزو شکايتونو کمېسيون له بايومېټريک پرته د کارول شويو رايو د باطلولو پرېکړه کړې، خو د ټاکنو خپلواک کمېسيون وايي چې د ټاکنيزو شکايتونو کمېسيون پرېکړه غير قانوني ده.
د ولسي جرګې رييس عبدالرووف ابراهیمي د يادې جرګې په پرونۍ غونډه کې وويل، خلکو له دې کبله په ټاکنو کې پراخ ګډون وکړ چې کمېسيون پکې د بايومېټريک ټکنالوژۍ د کارولو ژمنه کړې وه.
ابراهيمي په ټينګار سره وويل چې اوس دې د ټاکنو د روڼتيا لپاره پر شويو هوکړو عمل وشي.
نوموړي زياته کړه: «هیله لرم چې د ټاکنو خپلواک کمېسیون او د شکایاتو کمېسیون خپلې کړنې له قانون سره سمې او له هر هغه څه سره چې د انتخاباتو د شفافیت په اړه ورباندې توافق شوی وي، عمل وکړي چې د انتخاباتو پایلې خلکو ته د منلو وړ وي».
د ټاکنو خپلواک کمېسیون ویلي چې په ځینو ټاکنيزو مرکزونو کې د ټاکنو پر ورځ بایومېټریک سیستم سم کار نه دی کړی او دوی پرېکړه کړې چې په يادو مرکزونو کې له بايومېټريک پرته کارول شوې رايې هم وشمېري.
د ټاکنيزو شکایتونو کمېسیون بيا ویلي چې له بایومېټریک پرته کارول شوې رايې د باور وړ نه دي.
د ټاکنيزو شکايتونو کمېسيون وړمه ورځ د يوې خبرپاڼې په خپرولو سره وويل چې د هغو مرکزونو رايې به باطلې کړي چې له بايومېټريک پرته کارول شوې دي.
د ټاکنيزو شکايتونو د کمېسيون دا پرېکړه که څه هم له هرکلي سره مخ شوې خو د ټاکنو خپلواک کمېسيون غړي او وياند سيدحفيظ الله هاشمي بيا ويلي چې د ټاکنيزو شکايتونو د کمېسيون پرېکړه غير قانوني ده.
هاشمي ويلي، د ټاکنيزو شکايتونو کمېسيون د ټاکنو د خپلواک کمېسيون په چارو کې لاسوهنه کوي خو پر ټاکنو د څار بنسټونه بيا وايي چې د ټاکنيزو کمېسيونونو ټکر د ولسمشرۍ پر ټاکنو ناوړه اغېز کوي.
د افغانستان د ازادو او عادلانه ټاکنو بنسټ یا فیفا وايي، د رایو د شمېر پر سر د دواړو کمېسیونونو تقابل به د ولسي جرګې د ټاکنو د پایلو پر اعلان ناوړه اغېز وکړي او دا چاره به د ولسمشريزو ټاکنو مهالوېش هم اغېزمن کړي.
د دغه بنسټ جرایوي ريیس یوسف رشید ازادي راډیو ته ویلي، دواړه کمېسیونونه باید په خپلو کې سره کښېني او دې ستونزې ته د حل منطقي لاره ولټوي.
رشيد زياتوي: «باید دواړه کمېسیونونه په خپلو کې سره کښېني، ستونزې وڅېړي او د دواړو کمېسیونونو د ونډو د صلاحیتونو په ترکیب، د دغو قضیو لپاره د حل لار پیدا کړي، دوی باید یو بل د مطبوعاتو له لارې تورن نه کړي چې له دې چارې بیا یو شمېر سیاستوال ناوړه ګټه اخلي».
رشید وايي، که ټاکنيز کمېسیونونه وخت، شرایطو او حالاتو ته په کتو دې ستونزې ته د حل معقوله لاره ونه لټوي، پر ټاکنو به د افغانانو باور کمزوری او د ولسواکۍ دا پروسه به اغېزمنه شي.
