د امریکا او طالبانو تر منځ د هوکړې د عملي برخې له دریو پړاوونو یو بشپړیږي، خو لا هم بین الافغاني خبرې نه دي پیل شوې. ټاکل شوې وه چې د تېرې مارچ تر لسمې به پنځه زره طالب بندیان خوشې شي او ورسره به په یوه اونۍ کې بین الافغاني خبرې هم پیل شي، خو دا ده پنځمه میاشت روانه ده، نه پنځه زره طالب بندیان خوشې شوي دي او نه هم بین الافغاني خبرې پیل شوې دي. تر دې د اندېښنې وړ خبره دا ده چې لا هم د خبرو د پیل پر وړاندې ډېر خنډونه دي او ورسره یو ځل بیا جګړه زور اخلي. امریکایان وايي چې هوکړه یې عملي کړې، خپل ځواکونه یې ۸۶۰۰ ته را ښکته کړي دي او له څلورو ولایتونو یې هم خپل ځواکونه ایستلي دي. طالبان بیا امریکا ګرمه ګڼي چې هوکړه یې نقض کړې او په داسې حال چې دوی پر امریکا هېڅ برید نه دی کړی، خو امریکايي ځواکونو پر طالبانو پرله پسې هوايي بریدونه او عملیات کړي دي. د دې تر څنګ امریکا له دې امله هم ګرمه ګڼل شوې چې له طالبانو سره یې د بندیانو په خوشې کولو کې کړې ژمنه نه ده عملي کړې.
د طالبانو او امریکا تر منځ له شوې هوکړې تر اوسه پورې یوازې امریکا ګټه کړې ده، ځکه چې ځواکونه یې خوندي شوي، د سرتېرو خوندي وتلو ته یې لاره هواره شوې او میلیاردونه ډالره لګښت یې را کم شوی دی. د جګړې په افغاني اړخ بیا اوس هم زیان روان دی، اوس هم طالبان، حکومتي ځواکونه او ملکي وګړي وژل کېږي او لا معلومه نه ده چې تر کله پورې به دا حالت روان وي. دا هم ښکاره ده چې طالبانو له امریکا سره هوکړه بشپړه عملي کړې ده. طالبانو پر امریکا د برید نه کولو ژمنه کړې وه چې عملي کړې یې ده، خو امریکا پر طالبانو لسګونه هوايي بریدونه او عملیات کړي او د بندیانو په خوشې کولو کې یې هم خپله ژمنه نه ده عملي کړې.
اوس اساسي پوښتنه دا ده چې امریکا ولې د سولې هوکړه نه ده عملي کړې او ولې لا هم په افغانستان کې جګړه ده؟
امریکایانو د سولې هوکړه یوازې د ځان د خوندیتوب لپاره کوله او په افغانستان کې یې د جګړې ختمول نه غوښتل او آن هڅه یې کوله چې دا جګړه وغځوي. له همدې امله یې داسې هوکړه وکړه چې دوی خوندي شي، خو د افغانانو تر منځ ستونزې او جګړه دوام وکړي. د امریکا له خوا د پنځو زرو طالب بندیانو د خوشې کولو ژمنه د همدې لپاره شوې وه چې بیا یې عملي نه کړي او پر اساس یې جګړه وغځوي. اوس د جګړې د غځولو تر ټولو مهم او اصلي لامل همدا ګڼل کېږي چې پنځه زره طالب بندیان نه دي خوشې شوي. له همدې امله بین الافغاني خبرې نه دي پیل شوې او له همدې امله لا هم افغانان وژل کېږي.
ځینو افغاني کړیو هم د امریکا له دې دسیسې سره مرسته کړې ده او په همدې کې خپله ګته ويني، خو د جګړې ښکېلو اړخونو او په ځانګړي ډول هغوی ته چې رښتیا سوله غواړي پکار ده چې د امریکا دا دسیسه درک کړي او د سولې لپاره له خپله اړخه داسې قرباني ورکړي، چې ټول خنډونه لرې، بین الافغاني خبرې پیل او جګړه ختمه شي.
