عمر زاخېلوال: پر ډېورنډ اغزن سیم تېرول د هېچا په ګټه نه دي

افغان حکومت هم له پاکستان سره خلاصې پولې غواړي. د پاکستان لپاره د افغان ولسمشر ځانګړي استازي حضرت عمر زاخېلوال ویلي افغانستان هم غواړي له پاکستان سره خلاصې پولې ولري او ددې پر ځای چې پر ډېورنډ فرضي کرښه اغزن ولګول شي، دغه سیمه دې همداسې ازاده پرېښودل شي. دده په خبره د عمران خان له هغه خبرې ملاتړ کوي، چې ویلي یې و د افغانستان او پاکستان تر منځ باید پولې د اروپايي هېوادونو په څېر پرانیستې وي. نوموړي پر ډیورنډ فرضي کرښه د اغزن سیم د تېرولو په اړه ویلي، د پاکستان پوځ په دې کار سره تېروتنه کوي، ځکه دا دترهګرو د تګ راتګ مخنیوی نه کوي او نه هم ددواړو هېوادونو خلکو ته ګټه رسولی شي. دده په خبره د اغزن سیم د تېرولو پر ځای دې دواړه حکومتونه کوښښ وکړي، چې ګډو فرهنګونو ته وده ورکړي، د پولې دواړو غاړو خلکو ترمنځ د تګ راتګ اسانتیاوې ډېرې کړي او سوداګرۍ ته وده ورکړي. زاخېلوال همدا راز ویلي، چې پاکستان دې پر خپلو سیاستونو له سره کتنه وکړي او ملکي حکومت دې هڅه وکړي چې د پاکستانیانو د ژوند ښه کېدو ته هر اړخیزه توجه وکړي.