ترهګر په پاکستان کې له امنو مرکزونو او روزنې خوند اخلي

د جنوبي اسیا لپاره د اروپايي بنسټ مشر جنید قریشي په سویزرلنډ کې په یوه کنفرانس کې د خبرو پر مهال ویلي، چې ترهګر په پاکستان کې روزل کېږي او له هغه وروسته نورو هېوادونو ته لېږل کېږي. د قریشي په خبره ترهګر نه یوازې دا چې په پاکستان کې تر فشار لاندې نه دي، بلکې له هغو مرکزونو او روزنځایونو خوند اخلي چې پکې روزل کېږي. دده په خبره د ترهګرو پر رواني اړخونو ژور کار کېږي او دوی د ځانګړو روزنیزو دورو په مرسته په رواني توګه د ترهګریزو فعالیتونو لپاره روزل کېږي. جنید قریشي وایي دوی په دې اړه پراخې څېړنې کړې دي او پر نړیوالو بنسټونو یې غږ کړی دی چې پر پاکستان فشارونه ډېر کړي څو د ترهګرۍ او افراطیت له ملاتړه لاس په سر شي. دده په وینا که دا کار ونه شي نو نه یوازې افغانستان به امن نه شي بلکې د سیمې ډېری هېوادونه به په پاکستان کې د ترهګرو له امنو مرکزونه زیانونه وویني.