د میدان وردګو نوماندان: بایومټریک رایې دې له تقلبي رایو بېلې کړل شي

په ميدان وردګو ولايت کې د ولسي جرګې لپاره نوماندانو د شکايتونو له کمېسيون غوښتي چې بايومټريک شوې رایې دې له تقلبي رايو جلا کړي. ددغه ولايت د والي وياند عبدالرحمن منګل ويلي چې د ټاکنیزو شکایتونو خپلواک کمېسيون مرستیالې حمیرا حقمل پرون دغه ولايت ته سفر کړی و. منګل وايي، له دې ولايت څخه ولسي جرګې ته نوماندانو په خپلو خبرو کې له مېرمن حقمل سره ګڼ شمېر ستونزې شریکې کړې او ويې ویل چې په دې ولایت کې د ځینو نوماندانو په ګټه تقلب شوى چې دوی یې اسناد په لاس کې لري. نوماندانو د شکایتونو کمېسیون له مرستیالې دا هم وغوښتل، هغه رايې د باطلې اعلان کړي چې تقلبي دي او بايومټرک شوې رايې دې له تقلبي رايو څخه جلا کړي. مېرمن حقمل په خپلو خبرو کې ژمنه يې وکړه چې د ټاکنیزو شکایتونو خپلواک کمېسیون به د میدان وردګو ولایت د ټاکنو په اړه شوي شکایتونه په هر اړخیزه توګه وڅېړي او حق به حقدار ته ورکول کېږي.