حکمتیار: که درغلي نه وای اکثریت رایې به موږ ګټلې

حکمتیار وايي، ولسمشریزو ټاکنو ته پوره چمتو دي او اجازه نه ورکوي چې د ولسمشری ټاکنې وځنډول شي. د حزب اسلامي لخوا په خپرې شوې خبرپاڼه کې راغلي چې حکمتیار دا څرګندونې د کندوز ولایت له جهادي شخصیتونو، قومي مخورو او ځوانانو سره د لیدنې پر مهال کړې دي. حکمتیار ویلي، که ټاکنې رڼې وای، درغلي نه کېدلی او د خلکو رایو ته احترام کېدلی باور لري چې مطلق اکثریت رایې به حزب اسلامي ګټلې وې. حکمتیار زیاته کړې چې ټاکنې له ټولو نیمګړتیاوو سربېره د مبارزې یو فرصت و او حزب اسلامي په دې مبارزه کې فعال او ډېر حضور درلود. حکمتیار یو ځل بیا تکرار کړه، د ولسي جرګې تيرې ټاکنې یوه مسخره او شرموونکې لوبه وه. ګلبدین حکمتیار ټینګار کړی دی چې د ولسمشریزو ټاکنو لپاره پوره تیاری لري او اجازه نه ورکوي چې د ولسمشرۍ ټاکنې وځنډول شي. ټاکل شوې ولسمشریزې ټاکنې د ۱۳۹۸ کال په پسرلي کې ترسره شي.