د سولې عالي شورا؛ د سولې په برخه کې د وروستیو تحولاتو هرکلی کړی دی

د سولې عالي شورا ویاند احسان الله طاهري وايي، د سولې عالي شورا د هر هغه اقدام هرکلی کوي چې د سولې په برخه کې اخیستل کېږي. نوموړي د طالبانو د هغو پنځو غړو په اړه چې نوي قطر دفتر ته تللي او دوی به د سولې خبرې پيل کړي ویلي، هیله لري چې دوی د سولې د خبرو په برخه کې ګټور تمام شي. اسوشټيډ پریس راپور ورکړی چې د طالبانو پنځه پخواني غړي چې د ګوانټنامو زندان یې هم تېر کړی اوس په قطر کې دي. یاد اژانس ته د طالبانو ویاند ویلي چې دغه کسان به د سولې خبرې پیلوي او مذاکرات به ددوی پر غاړه وي. د سولې عالي شورا بیا دې تحولاتو ته هیله مندي ښيي او په وینا یې دوی د افغانانو په مشرۍ او مالکیت د سولې د خبرو له هر ډول پرمختګ ملاتړ کوي. بل پلو مشرانو جرګې بیا ویلي وو، چې حکومت دې د طالبانو او امریکا ترمنځ خبرې وڅاري. د سناتورانو په وینا دمګړی امریکا هر څه پخپله پر مخ وړي، خو حکومت باید په دې ټولو خبرو کې شریک او دخیل وي.