معترض نوماندان: له بایومټریک پرته کارول شوې رایې د منلو نه دي

یوشمېر معترض نوماندان وايي، له بایومټریک پرته کارول شوې رایې دې باطل شي. د ولسي جرګې یوشمېر معترض نوماندان، چې د افغانستان له مختلفو ولایتونو را غونډ شوي د ولسي جرګې ټاکنې له درغلیو ډکې بولي او وايي، چې سپینې او تورې رایې دې سره جلا شي او د رایو د شمېر معیار باید بایومټریک سیستم وي. دغه نوماندان خبرداری ورکوي، که د ټاکنو کمېسیون د دوی غوښتنو ته رسیده ګي ونه کړي او له بایومټریک پرته کارول شویو رایو ته مشروعیت ورکړي د افغانستان د شمالي ولایتونو لویه لار به وتړي او کابل ته د واردیدونکې برېښنا لین به پرې کړي. معترض نوماندان وايي، د افغانستنان په اکثرو ولایتونو کې په ټاکنو کې پراخې درغلۍ شوي، صندوقونه د زورواکانو له لوري ډک شوي، نمایشي جګړې جوړې شوي او ان د رایو صندوقونه په کورونو کې ډک شوې دي. دغه نوماندان وایي، چې له بایومټریک پرته کارول شوې رایې د منلو نه دي او د رای شمېرنې اصلي معیار باید بایومټریک شوې رایې وي.