مټیس: له سولې وروسته به د امریکایي ځواکونو پر رول بحث کوو

جېمز مټیس وايي، په افغانستان کې تر سولې وروسته د امريکايي ځواکونو پر رول مشروط بحث کېداى شي. د امريکا دفاع وزير جيمز ميټس پرون په واشنګټن کې د سولې انسټيټيوټ ته د وینا پر مهال ويلي، په افغانستان کې د سولې تر تړون وروسته به له افغان حکومت سره په همغږۍ د امريکايي ځواکونو پر رول خبرې وکړي. نوموړي د ډیرو جزییاتو له ورکولو پرته وویل، د امريکايي ځواکونو پر رول په مشروط ډول حالاتو ته په کتو بحث کېداى شي. هغه دغه راز ويلي، د افغان سولې لپاره نوي ټاکل شوي استازي زلمي خليلزاد د سولې او ملي پخلاينې په موخه سختې هڅې پيل کړې دي او دا هڅې د امريکا د سوېلي اسيا د تګلارې يوه برخه ده. هغه وايي، افغان ځواکونه اوس پياوړي شوي او د خپل دښمن پر وړاندې يې برياوې ترلاسه کړې دي. د هغه په وينا، افغان ځواکونو په وار وار دا ښودلې چې دوی کولی شي د خپلو سیمو امنیت په خپله خوندي کړي.