تېره میاشت په هېواد کې ۲۷۳ ملکيان وژل شوي دي

د ملکي وګړو د ساتنې او عدالتغوښتنې ډلې په خپل راپور کې ویلي چې په تېره اکتوبر میاشت د هېواد په بېلابېلو ولایتونو کې ۸۱۸ ملکي وګړو ته مرګ ژوبله اوښتې ده. په راپور کې راځي چې له دې ډلې ۲۷۳ ملکیان په بېلو پېښو کې وژل شوي او ۵۵۰ نور ټپیان دي. راپور زیاتوي وسله والو طالبانو د ټاکنو په اوږدو کې په بېلو ولایتونو کې ملکیان په نښه کړي دي همدا راز د بهرنیو او افغان ځواکونو په هوایي او ځمکنیو عملیاتو کې هم ګڼو ملکیانو ته مرګ ژوبله اوښتې ده. سرچینه زیاتوي، په ننګرهار کې د ملکي وګړو د مرګ ژوبلې پېښې تر ټولو ډېرې وې او ورپسې هلمند ولایت دی. په ننګرهار کې په همدې یوه میاشت کې ۶۱ ملکیان وژل شوي او ۶۷ نور ټپیان دي. په هلمند کې بیا ۳۵ ملکیان وژل شوي او ۴۵ نور ټپيان دي. سرچینه کاږي په دې ډله کې ۷۰ ماشومانو ته هم مرګ ژوبله اوښتې چې ۴۰ کسه وژل شوي او ۳۰ نور ټپیان دي. دغه ډله د جګړې پر ټولو ښکېلو خواوو غږ کوي چې نور دې په هېواد کې روانه جګړه پای ته ورسوی او د ملکي وګړو ژوند ته دې جدي پاملرنه وکړي.