له تمې سره سم د سولې مشورتي لویې جرګې پرېکړه وکړه چې حکومت د طالبانو پاتې څلور سوه بندیان هم خوشې کړي، څو د سولې د بین الافغاني خبرو پیل ته لاره هواره شي. جرګې ځینې نورې غوښتنې هم کړې دي، خو یوه بله د پام وړ خبره یې دا ده چې د تېرو اتلسو کلونو په لاسته راوړنو او پر جمهوریت یې ټینګار کړی دی.
له پیله همدا اټکل کېده چې جرګه به د بندیانو د خوشې کولو تایید کوي او بیا چې کله امریکایانو د جرګې ملاتړ وکړ، نو بېخي روښانه شوه چې جرګه به همدا پرېکړه کوي او حکومت هم همدا غوښتل. که څه هم په پرېکړه کې ځینې داسې مسایل شته چې وروسته لانجه جوړولی شي، خو د جرګې دا پرېکړه چې پاتې طالب بندیان دې خوشې شي، د ټولو اړخونو او ولس له هرکلي سره مخ شوې ده، ځکه چې تمه کېږي چې په دې سره به بین الافغاني خبرې پیل شي. طالبانو هم ویلي چې که یې بندیان ور خوشې شي، نو په یوه اونۍ کې به بین الافغاني خبرې پیل کړي. اوس که حکومت په نن او سبا کې دا بندیان خوشې کړي، نو بیا په راتلونکې اونۍ کې د خبرو پیل ته لاره هوارېدلی شي.
د جرګې سیاسي اړخونه پر خپل ځای، خو یو څه پکې روښانه شول او هغه دا چې افغانان په یوه غږ سوله غواړي. د دې لپاره هر ډول قربانۍ ته تیار دي، ټولې کینې او نفرتونه هېروي او آن خلک د خپلو اولادونو وژونکي هم د سولې لپاره بښي. دا د افغانانو یو ښه خاصیت دی چې له نېکه مرغه په دې جرګه کې یو ځل بیا را څرګند شو. جرګې که څه هم د ټولو افغانانو استازیتوب نه کاوه، خو یو ځل بیا یې د سولې مخالفینو او جګړه غوښتونکو ته منفي ځواب ورکړ. له همدې امله دا کار د ستاینې او قدر وړ دی.
د جرګې له دې پرېکړې وروسته اوس پکار ده چې په چټکۍ سره دا بندیان خوشې شي. طالبان دې هم په اعلان شوي یا نا اعلان شوي ډول جګړه ودروي او تاوتریخوالی دې تر ممکن حده کم کړي. څومره ژر چې شونې وي باید بین الافغاني خبرې پیل شي. د خبرو په لومړنۍ غونډه کې باید پر اوربند توافق وشي او د دې لپاره چې طالبان ورته غاړه کېږدي، حکومتي اړخ دې د نورو طالبانو د خلاصون ژمنه هم وکړي. په دې سره به هم جګړه درول شوي او هم د خبرو لپاره لا زیات حسن نیت ښودل شوی وي او یوه ښه فضا به برابره شوې وي.
ځیني کړۍ شته چې بیا هم هڅه کوي، ستونزې پیدا کړي. دوی به هڅه وکړي چې د خبرو پیل وځنډوي او بیا که پیل هم شي، هڅه به وکړي چې د بریا مخه یې ونیسي. له همدې امله ټول سوله غوښتونکي اړخونه او افغان ولس باید په جدیت سره د دغو هڅو مخه ونیسي. اوس هغه وخت دی چې جګړه غوښتونکي او د سولې ضد کسان، که په هر لوري کې وي، منزوي او ورټل شي. اوس د سولې د خبرو د پیل او بریا وخت دی او د سولې غوښتونکي او افغان ولس باید پرې نږدي چې دا چانس ضایع شي.
