شنونکي: د مټیس څرګندونې د سولې خبرو په زیان دي

د چارو شنونکي وایي، په افغانستان کې د امریکايي ځواکونو حضور په تړاو د امریکا دفاع وزیر څرګندونې د سولې خبرې سبوتاژ کوي. په داسې حال کې، چې طالبانو د خبرو اترو لپاره له افغانستان څخه د بهرنیو ځواکونو وتل خپل اساسي شرط ګڼي، د امریکا دفاع وزیر وايي، چې په افغانستان کې د بهرنیو ځواکونو د رول په تړاو د سولې تر خبرو وروسته بحث کوي. د چارو شنونکي وایي، د امریکایي چارواکو دغه څرګندونې د سولې پروسې لپاره د خنډ جوړولو په مفهوم دي. جېمز مټیس په واشنګټن کې د سولې انسټيټيوټ ته د وینا پر مهال وویل، چې په افغانستان کې د سولې تر تړون وروسته به له افغان حکومت سره په همغږۍ په مشروط ډول د امريکايي ځواکونو پر رول خبرې کوي. په ورته مهال داسې ویل کېږی، چې امریکا غواړي، د طالبانو له یوې ډلې سره خبرې وکړي او ددې ډلې یوه برخه په جګړه کې پاتې شي. شنونکي وایي، که له طالبانو سره سوله کیږي، باید ټول طالبان پکې شامل وي، ځکه په جګړه کې د یوې ډلې پاتې کېدل جګړه نه ختموي. سیاسي شنونکي داسې مهال د امریکا دفاع وزیر پر وروستیو څرګندونو غبرګون ښيي، چې د افغان سولې په برخه کې د امریکا ځانکړي استازي زلمي خليلزاد د سولې او ملي پخلاينې په هدف هڅې ګړندۍ کړي دي.