طالبان: په چورلکه کې د وژل شویو کسانو جسدونه له موږ سره دي

وسله وال طالبان وایي، د فراه په انار دره کې د ویشتل شوې چورلکې په پېښه کې د وژل شویو کسانو جسدونه له دوی سره دي. د طالبانو ویاند قاري یوسف احمدي رسنیو ته په استولې خبر پاڼه کې ویلي، د فراه په انار دره کې د دوی له لوري د ویشتل شوې چورلکې په پېښه کې د ۲۸ کسانو جسدونه لا هم د وسله والو طالبانو په ولکه کې دي او که حکومت غواړي دغه جسدونه د سره صلیب له لارې خپلو کورنیو ته وسپارل شي، نو په بدل کې یې باید افغان حکومت د کندهار پر امینه قوماندان د برید کوونکي وسله وال ذبیح الله ابو دوجانه جسد هم سره صلیب ته وسپاري تر څو دوی ته ورسېږي. طالبان وایي، که دغه تبادله هر څومره ځنډېږي مسوولیت به یې د افغان حکومت پر غاړه وي. دوه ورځې وړاندې د هرات او فراه ولایتونو ترمنځ په انار دره کې د افغان ځواکونو د یوې چورلکې د سقوط په پېښه کې لږ تر لږه ۲۵ تنه ووژل شول. افغان حکومت وایي، چې چورلکې د هوا د خرابوالي له کبله له غره سره تر ټکر وروسته سقوط کړی، خو وسله وال طالبان بیا وایي، چې چورلکه د دوی په برېد کې غورځېدلې چې د یو شمېر لوړ پوړو چارواکو په ګډون پکې ۲۸ تنه وژل شوي دي.