حامد کرزی: د افغانستان د سولې پر سر د هېڅ بهرني معامله د منلو وړ نه ده

پخواني ولسمشر حامد کرزي له اسوشټيډ پرېس سره په خپله وروستۍ مرکه کې ویلي، چې د امریکا له لوري د افغان سولې په اړه وروستیو هڅو ته هیله من دی او ملاتړ یې کوي. دده په خبره که امریکا په رښتیا وغواړي چې د افغانستان ستونزه د خبرو له لارې حل کړي نو دا د ټولې سیمې لپاره ښه زیری دی. هغه ویلي د طالبانو او امریکایانو ترمنځ خبرې پيل شوې دي، خو دا خبرې باید واضح وي او له افغان حکومت پټې معاملې پکې و نه شي. دده په وینا هېڅ هېواد ته اجازه نه ورکوي چې د افغانستان د سولې پر سر معامله وکړي. نوموړي د امریکا له لوري د طالب بندیانو خوشي کولو او بیا په قطر کې له ګوانتنامو د خوشي شوو بندیانو حضور ته هیله مندي ښودلې ده. دده په خبره دغه کسان په طالبانو کې پراخ نفوذ لري او ددغه ډلې مهم غړي دي نو ارو مرو به د سولې په برخه کې ددوی هڅې اغېزناکې وي. نوموړي یو ځل بیا ټینګار کړی چې د افغانستان ستونزه نظامي حل نه لري او دی د هر ډول سیاسي حل چې د افغانانو په خیر وي ملاتړ کوي.