پکتیاوال: که ولسمشر پر خپلو ژمنو عمل ونه کړي ټاکنو کې ګډون نه کوو

د پکتيا ولايتي شورا ځينو غړو، قومي مخورو او ځوانانو ويلي، په تېرو څو کلونو کې په دغه ولايت کې هېڅ کومه لويه پروژه نه ده پلې شوې. دوی وايي که د ولسمشر له خوا له دغه ولايت سره شوې ژمنې عملي نه شي، نو په راتلونکو ولسمشمريزو ټاکنو کې به ګډون ونه کړي. قومي مخور وایي چې په پکتيا کې د پوهنې او روغتيا په برخو کې خورا ډېرې ستونزې دي او د دغه ولايت مهم سړکونه هم نه دي جوړ شوي. د ولايتي شورا غړي په پکتيا کې د اقتصادي اسانتياوو برابرول، د پکتيا د کدرونو ګمارل او د ولسمشر لخوا له پکتياوالو سره لاسليک کړې دولس پروژې عملي کول اساسي يادوي او وايي که يې کارونه پيل نشي، د ارګ مخې ته به خېمه ووهي او په مدني اعتراضونو به لاس پورې کړي. د يادونې ده، د ولسمشر غني له خوا له پکتيا سره د شوو ژمنو له ډلې يوازې د وارداتي برېښنا رسېدل عملي شوي چې د هغې د وېش پروسه هم د شپږو مياشتو په ځنډ اوس پيل شوې ده.