روسیې طالبانو سره د خبرو لپاره افغان سیاستوالو ته بلنه ورکړې

روسیې په مسکو غونډه کې د ګډون او له طالبانو سره د خبرو په موخه ځینې وتلیو افغان سیاستوالو ته د ګډون بلنه ورکړې ده. د هغو سیاستوالو له ډلې چې مسکو ته بلل شوي دي یو یې هم پخوانی ولسمشر حامد کرزی دی. رویټرز اژانس خبر ورکړی چې په تېرو دوو میاشتو کې د دغه کنفرانس لپاره بلنه بیا بیا تمدید شوې ده. د اژانس د راپور پر بنسټ په دې ډله کې د افغان مشرانو همکاران او هغه مخکښ سیاستوال هم شامل دي چې له افغان حکومت سره اړیکې لري. په کابل کې د روسیې سفارت په دې تړاو له څرګندونو نه ډډه کړې ده. ټاکل شوې وه یاده ناسته د سپټمبر میاشت کې جوړه شي خو د افغان حکومت په غوښتنه وځنډول شوه. بیا ویل کېدل چې ښایي د روانې میاشتې په لومړۍ نیټه تر سره شي خو د بهرنیو چارو وزارت په وینا دوی په دې تړاو له روسیي چارواکو سره خبرې پیل کړې دي او دا به وروسته روښانه شي چې یاده ناسته څه وخت او د چا په ګډون تر سره کېږي.