حکمتیار طالبانو ته: که تاسې جګړه ودروی، بهرنیان به هم ووځي

د حزب اسلامي ګوند مشر ګلبدین حکمتیار وایي طالبانو د افغان سولې لپاره د امریکا له استازي سره په لیدنه کې له افغانستانه د بهرنیو ځواکونو وتل د سولې لپاره لومړنی شرط ایښی دی، خو اوس دا په طالبانو پورې اړه لري چې څنګه د بهرنیو ځواکونو وتلو ته زمینه برابروي. هغه ویلي خلیلزاد طالبانو ته ویلي چې دوی دې له افغانستان د بهرنیو ځواکونو وتلو ته زمینه مساعده کړي. نوموړي طالبانو ته په خطاب کې ویلي، که دوی جګړه ودروي نو امریکا به هم له افغانستانه ووځي. د حکمتیار په خبره له طالبانو سره په مستقیم او غیر مستقیم ډول اړیکې لري او هغوی د یو ښکاره زماني جدول له مخې د بهرنیو ځواکونو د وتلو موضوع مطرح کوي، خو حاضر نه دي له افغان حکومت سره مخامخ خبرو ته کېني. حکمتیار ویلي تر دې ورهاخوا د خلیلزاد او طالبانو تر منځ اضافه خبرې نه دې شوي خو په خبره یې دا یو مثبت ګام دی. په همدې حال کې د سولې عالي شورا وایي چې د طالبانو او افغان حکومت تر منځ خبرې یو جدي مرحلې ته داخلې شوې دي. دا په داسې حال کې ده چې طالبانو څو ورځې وړاندې ویلي و چې له ګوانتانامو زندانه خوشې شوي پنځه ملګري به یې د سولې خبرې مخ ته بوځي.