زلمی خلیلزاد:  د سولې هڅې له افغان حکومت سره په همغږۍ مخ ته ځي

د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد پرون ماښام له ولسمشر غني سره کتلي دي. د ارګ له مطبوعاتي دفتره په خپره شوې خبرپاڼه کې راغلي چې دواړو لورو د افغان سولې په اړه بحثونه کړي دي. په دې لیدنه کې زلمي خلیلزاد ویلي چې د افغان سولې لپاره یې د سفرونو دویم پړاو پيل کړی دی او تر سفرونو وروسته به کابل ته راګرځي او د خپلو لیدنو او خبرو پایله به له ولسمشر غني سره شریکوي. دده په خبره د سولې هڅې له افغان حکومت سره په پوره همغږۍ مخ ته روانې دي. ولسمشر هم په دې لیدنه کې د افغانانو په مشرۍ او مالکیت د سولې پر خبرو ټینګار کړی دی او وايي د سولې ټولې هڅې باید له افغان حکومت سره په مشوره مخ ته لاړې شي. تر دې وړاندې داسې راپورونه خپاره شوي وو، چې ګواکي امریکا پخپل سر او له افغان حکومت سره تر مشورې پرته له طالبانو سره مذاکرات پيل کړي دي او دې مسئلې د افغان حکومت اندېښنه پارولې ده.