په هرات کې د افغان – ترک ښوونځي زدکوونکي او د دوی د کورنیو ګډه کمېټه وایي چې امنیتي ځواکونو د دغه ښوونځي یو شمېر ښوونکي او زدکوونکي نیولي دي.
په هرات کې د افغان ترک ښوونځي ځینو زدکوونکو ادعا کړې چې پرون سهار شاوخوا شپږ بجې امنیتي ځواکونه ښوونځي ته وردننوتي او ان د ښوونځي په انګړ کې يې ډزې کړې دي.
عیني شاهدانو هم ویلي چې پرون سهار امنیتي ځواکونه د افغان – ترک د هلکانو ښوونځي ته وردننه شول او د انګړ دروازه یې وتړله.
امنیتي ځواکونه د څو ساعتونو په تېریدو سره هم د دغه ښوونځي په شاوخوا کې ګرځېدل او رسنيو ته يې اجازه نه ورکوله چې ښوونځي ته نږدې ورشي.
د زدکوونکو د کورنیو کمېټې ښوونځي ته د امنیتي ځواکونو دننه کېدل، د ښوونځي تړل او د زدکوونکو او ښوونکو نیول په کلکو ټکو غندلي او دغه یې د نه منلو وړ بللی دی.
د هرات پولیسو، د پوهنې ریاست او سیمه ییزې ادارې په دې اړه له څه ویلو ډډه کړې، خو دوه میاشتې مخکې د شبرغان ښار د افغان- ترک ښوونځي یو شمېر ښوونکي هم امنیتي ځواکونو نیولي وو.
د افغان ترک ښوونځي په ترکيه کې د ۲۰۱۶ کال د ناکامې کودتا د طراح فتح الله ګولن د غورځنګ اړوند وو چې وروسته د يوه تړون له مخې د افغان حکومت له لوري د ترکيې حکومت ته وسپارل شول.
