په کندهار کې د ولسي جرګې یو شمېر کاندیدان وايي، په ټاکنو کې پراخې درغلۍ شوې او له همدې امله له بایومېټریک پرته کارول شوې رایې نه مني.
هغوی دغه راز غوښتنه کوي چې مرکزي اداره دې د ټولو کارول شويو رایو د څېړنې او شمېرنې لپاره صلاحیت لرونکی پلاوی کندهار ته ولېږي.
له کندهاره ولسي جرګې ته نوماند نورمحمد عقاد پرون يوې خبري ناستې ته وویل، که څه هم په کندهار کې ټاکنې یوه اونۍ وځنډېدې او د خلکو هیله دا وه چې له دغه فرصت څخه په استفادې او د نورو ولایتونو په ټاکنو کې ستونزو ته په پام به ښې ټاکنې وشي، خو له بده مرغه دغه یوه اونۍ د اصلاحاتو پر ځای د درغلګرو له خوا د معاملو لپاره وکارول شوه.
هغه تور پورې کړ چې له ۱۰ تر ۱۵ کاندیدانو د ټاکنیزو کمېسیونونو له کارکوونکو او پولیسو سره معاملې کړې او له بېلابېلو لارو په کار اخیستو یې د هغوی په ګټه په ټاکنو کې درغلۍ کړې دي.
ده تور پورې کړ چې یوازې همدغه درغلي کوونکي کاندیدان غلي دي، خو پاتې له ۸۰ تر ۹۰ کاندیدان شفافیت غواړي.
دی وايي، دوی د درغلګرو کاندیدانو په ګډون د ټاکنیزو کمېسیونونو او هغو پولیسو محاکمه غواړي چې په ولسوالیو کې یې د ټاکنو په ورځ درغلۍ کړې دي.
نوموړي غوښتنه کړه چې مرکز دې یو صلاحیت لرونکی پلاوی کندهار ته ولېږي، څو دغه موارد په بې پرې توګه وڅېړي.
د شبیر احمد قیومي په نوم بل کاندید وویل، ټاکنې یوه ملي پروسه ده او په دې پروسه کې خیانت کوونکی هم ملي خاین دی.
ده هم تور پورې کړ چې د کندهار په ټاکنو کې سازمان شوې او سیستماتیکې درغلۍ شوې دي چې باید په بې پرې توګه یې دقیقه څېړنه وشي.
هغه د ټاکنیزو کمېسیونونو مسوولین په غفلت او معامله ګرۍ تورن کړل او د هغوی محاکمه یې وغوښته.
یوه بل کاندید سید احمد سیلاب وویل چې خلک د سر په بیه راووتل او رایې وکارولې، خو څو تنه د هغوی په برخلیک لوبې کوي.
ده وویل چې تر ټولو اسانه او ارزانه لاره دا ده چې یوازې بایومېټریک رایې د حساب وړ وبلل شي.
د کاندیداند د دغو څرګندونو په ځواب کې په کندهار کې د ټاکنو د خپلواک کمېسیون مشر ډاکټر نعمت الله وردګ ویلي چې دغه ډول څرګندونې یوازې د وخت ضیاع ده.
هغه زیاته کړه، دوی دا مني چې په ټاکنو کې تخنیکي ستونزې وې، ښايي په ځینو مواردو کې درغلۍ هم شوې وي چې په اړه یې شکایتونه ثبت شوي او د قانون له مخې څېړل کېږي، خو دا په دې معنا نه ده چې ګواکې ټولې ټاکنې له درغلیو ډکې وې.
دی وايي، د شکایتونو کمېسیون د دغو شکایتونو د څېړلو لړۍ پيل کړې ده او په دې برخه کې په جدیت کار کوي.
