د ولسي جرګې ځينې غړي وايي چې د سولې د عالي شورا په پرتله، طالبانو د مسکو له غونډې ډېره ګټه پورته کړه.
د مسکو په غونډه کې د افغانستان د سولې عالي شورا او د طالبانو د سیاسي استازو تر ګډون وروسته، داسې نيوکو زور اخيستی چې ګواکي د سولې د عالي شورا د درې کسيز پلاوي ګډون په غونډه کې د طالب استازو د فعاليت تر اغېزې لاندې راغی.
د ولسي جرګې دويم منشي عرفان الله عرفان یو له هغو کسانو دی چې وايي طالب استازو د مسکو له غونډې ډېره ګټه پورته کړه. عرفان د بېلګې په توګه وايي چې د طالبانو پنځه کسیز پلاوي د سولې د عالي شورا د استازو په پرتله له نړیوالو رسنیو ډېره استفاده وکړه او په دې توګه د هغوی خبرې د رسنيو په سرټکو بدلې شوې.
عرفان په دې باور دی چې طالبانو ته د دومره فعاليت زمينه روسيې برابره کړې وه.
نوموړي ويلي: «هغه غونډه چې په مسکو کې جوړه شوې وه، دا یو مانور و چې روسیې اجرا کړ، امریکا ته یې خپل موقف څرګند کړ او همدا شان طالبانو نمایش اجرا کړ او ښکاره یې کړه چې د دې وړتیا لرم چې په افغانستان کې رول ادا کړم.»
د وسله والو طالبانو استازو او د افغانستان د سولې عالي شورا غړو د روسیې په کوربه توب د جمعې په ورځ په مسکو کې سره خبرې وکړې.
په دغه غونډه کې د روسیې او پاکستان په ګډون د لسو هېوادونو استازو ګډون کړی و.
افغان دولت د مسکو په غونډه کې له ګډون کولو انکار وکړ، خو د بهرنیو چارو وزارت په خبره، د افغانستان د سولې عالي شورا د یوه خپلواک ارګان په توګه په دې غونډه کې ګډون وکړ.
که څه هم په غونډه کې د افغان حکومت او وسله والو طالبانو ترمنځ د بین الافغاني خبرو په پیل ټینګار کېده، خو د طالبانو پلاوي د خبرو د پيل لپاره د بهرنیو ځواکونو د وتلو شرط کېښود.
په ورته وخت کې د سولې عالي شورا ویاند سید احسان طاهري ازادي راډيو ته ويلي چې د دوی پلاوي له یوه پیاوړي دریځه د مسکو په غونډه کې ګډون وکړ.
طاهري زياته کړې: «هیله لرو چې خصومت او ځینې شخصي موضوعات مطرح نه کړي او افغانستان په پام کې ونیسي، هر فرصت چې د افغانستان په ګټه وي، د سولې عالي شورا به ورنه استفاده وکړي او په قوت به ګام اخلي او همداشان باید ووایو چې دا غونډه ډېره ګټوره وه.»
د طاهري په خبره، د روسیې په ګډون د غونډې اکثرو غړو د بین الافغاني مذاکراتو په پيل ټینګار کاوه.
