د ملي دفاع وزارت وایي، په دریو پړاوونو کې یې سلګونه جنرالانو ته تقاعد ورکړی او هر تقاعد شوي جنرال تر لس زرو ډالرو امتیازات تر لاسه کړي دي.
د دغه وزارت ویاند غفور احمد جاوید وايي چې په تېرو ۱۱میاشتو کې د افسرانو د ذاتي قانونو پر اساس د اردو ۳۰۵ ستر جنرالان، ډګر جنرالان، تورن جنرالان او برید جنرالان تقاعد شوي دي.
جاوید زیاته کړې: «دغه جنرالان په داسې احترام شکل باندې تقاعد شول چې په هېڅ نړۍ کې د دې ساری نشته، هغه اخیري معاش چې د دوی و هماغه ورته ورکول کېږي، د دې ترڅنګ دغه جنرالان چې تقاعد شول له اتو نه تر لس زرو ډالرو امتیاز هم دوی ته ورکړل شوی دی».
د افسرانو د ذاتي قانون له مخې، هر ستر جنرال ته ۶۲، ډګر جنرال ته ۶۰، تورن جنرال ته ۵۸، برید جنرال ته ۵۶ او ډګروالانو او نورو افسرانو ته ۵۴ کاله د تقاعد سن ټاکل شوی دی.
دفاع وزارت د جنرالانو د تقاعد یوه موخه، په اردو کې اصلاحات او د ځوانو کادرونو ځای پر ځای کول بولي.
د اردو د جنرالانو د دقیق شمېر په اړه دفاع وزارت څه ونه ویل، خو له دې وړاندې دغه وزارت امریکا غږ ته ویلي وو چې د افسرانو د بیا کتل شوي ذاتي قانون پر اساس به یوازې ۳۰ سلنه برحاله جنرالان په دغه وزارت کې پاتې شي.
جاوید همدارنګه ویلي چې دا مهال ځوان کادرونه د تقاعد شويو جنرالانو پر ځای کار کوي چې هر یو په هندوستان، ترکیه، اېټالیا، انګلستان او د مارشال فهیم په نوم پوځي اکاډمۍ کې زدهکړې کړې دي.
له دې وړاندې یو شمېر کسانو پر دې نیوکه کوله چې د جنرالۍ رتبه ځوانو او بې تجربې ځوانانو ته ورکول کېږي؛ خو د دفاع وزارت ویاند بیا ویلي چې د جنرالۍ رتبه ځوانانو ته د یو امتیاز په بڼه نه، بلکې د پوهې د ارزیابۍ، مدیریت او کاري سوابقو د کتلو پر اساس ورکول کېږي.
