د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد د سیمې هېوادونو ته د خپل دويم سفر په ترڅ کې کابل ته راغلی.
د ولسمشرۍ ماڼۍ مرستيال وياند شاه حسین مرتضوي وايي چې خلیلزاد کابل ته په سفر کې له ولسمشر غني سره وکتل.
ارګ هم په يوه خبرپاڼه کې ویلي چې خلیلزاد وړمه شپه له ولسمشر غني سره لیدنه کې د افغانانو په مشرۍ او مدیریت د سولې په هدف د سیمې هېوادونو ته د خپلو دويم ځلي سفرونو او پروګرامونو په اړه معلومات ورکړل.
د خبرپاڼې د معلوماتو له مخې، خلیلزاد ویلي چې د خپل دويم ځلي سفرونو پایلې او راپور به کابل ته تر بېرته راګرځېدو وروسته له افغان ولسمشر سره شریک کړي.
سرچينه زياتوي، ولسمشر غني له خلیلزاد څخه په مننې د افغانانو په مشرۍ او مدیریت د بین الافغاني مذاکراتو په برخه کې د هر اقدام هرکلی کړی.
زلمی خلیلزاد د روان کال د وږي میاشتې پر ۱۴مه د افغان سولې لپاره د امریکا د بهرنیو چارو وزارت ځانګړی استازی وټاکل شو.
د امریکا د بهرنیو چارو وزارت د افغان سولې لپاره د ځانګړي استازي په توګه د زلمي خلیلزاد تر ټاکل کېدو وروسته ویلي وو چې زلمی خلیلزاد به د امریکا د بهرنيو چارو د وزرات له ټیم سره د روغې جوړې په پړاو کې مرسته وکړي.
خلیلزاد د خپل نوي ماموریت په لومړیو سفرونو کې د تلې پر ۱۲مه د افغانستان په ګډون د سیمې د پنځو هېوادنو، پاکستان، متحده عربي اماراتو، قطر او سعودي عربستان له چارواکو سره د افغان سولې په اړه خبرې وکړې.
خلیلزاد کابل ته د خپل لومړي سفر په ترڅ کې له وسله والو طالبانو وغوښتل چې د سولې اړوند خبرو اترو لپاره خپل استازې ورمعرفي کړي.
په لومړي پړاو سفر کې د زلمي خلیلزاد په غوښتنه د پاکستان لخوا د طالبانو د پخواني مشر د مرستیال ملا عبدالغني برادر خوشي کول او د طالبانو د قطر له دفتر سره د ګوانتنامو د پخوانیو طالب زندانیانو یو ځای کېدل د سولې د خبرو د بریالیتوب لپاره د هغه د پیل شويو هڅو لومړی پرمختګ و.
قطر ته د خلیلزاد د سفر په ترڅ کې وسله والو طالبانو هم ویلي وو چې د دوی د قطر دفتر استازو له خلیلزاد سره د افغانستان د مسئلې پر سوله ییز حل خبرې کړې دي.
زلمی خلیلزاد په داسې حال کې د افغان سولې لپاره د افغانستان په ګډون د سیمې هېوادونو ته خپل دويم ځلې سفرونه پیلوي چې د تېرې جمعې په ورځ مسکو د افغان سولې اړوند یوې غونډې کوربه و.
د مسکو په غونډه کې د افغانستان د سولې عالي شورا پر پلاوي سربېره د وسله والو طالبانو د استازو او ۱۲ نورو هېوادونو پلاوو هم ګډون کړی و.
د سولې شورا او د چارو ځينې افغان شنونکي د سيمې هېوادونو ته د زلمي خليلزاد دويم سفر ته هيله من دي او وايي چې ورته سفرونه به تر سولې د افغانانو مزل لا نور هم لنډ کړي.
له دې سره سره هم د سولې د خبرو د مالکيت په تړاو خبرې او اندېښنې پر خپل ځای دي او ويل کېږي چې افغان حکومت په دې پروسه کې څنډې ته شوی دی. وړاندې ځينو لويديځو رسنيو لا دا ادعا هم کړې وه چې زلمی خليلزاد د سولې په تړاو د خپلو هڅو جزيات له حکومت سره نه شريکوي.
