د جاغوریو جګړې ملکیانو، طالبانو او افغان ځواکونو ته تلفات اړولي

د غزني په جاغوري ولسوالۍ کې خونړیو نښتو ملکیانو، طالبانو او افغان ځواکونو ته تلفات اړولي دي. په غزني کې امنیتي سرچینې وايي چې په دغه ولسوالۍ کې خونړۍ نښتې شوې دي او لا هم خال خال جګړه روانه ده. له شپږو ورځو راهیسې طالبانو د غزني پر جاغوري برید کړی دی. حکومت وايي چې د کمانډو ځواکونو په رسېدو سره طالبان پر شا تمبول شوي او جګړې کابو شوې دي، خو ځایي اوسېدونکي وايي چې تېره شپه بیا هم جګړه خورا شدیده وه. د غزني د امنیه قومندانۍ ویاند احمد خان سیرت وایي چې په دغه نښتو کې ۱۰ کمانډو ځواکونه هم وژل شوي او شپږ نور ټپیان دي. دده په خبره د یادو ځواکونو ترڅنګ پنځلس ملکي وګړي هم وژل شوي دي او اته نور ټپیان دي. ده وویل چې ددې تر څنګ ۳۹ طالب وسله وال هم وژل شوي دي. وسله وال طالبان بیا وايي چې د افغان ځواکونو پنځه مهمې پوستې یې نیولې دي او دغه ځواکونو ته د درنې مرګ ژوبلې د اړولو ادعا کوي.