په کابل، غزني او بلخ کې د امنیت د غوښتني لاریونونه روان دي

تېره شپه په کابل کې لسګونه لاریون کوونکو د هېواد مرکزي هزاره مېشتو سیمو د امنیت د تامین غوښتنه کوله. دوی پر حکومت تور پورې کاوه، چې د خلکو د امنیت په تامین کې پاتې راغلی دی، چې د همدې بې غوریو له امله هره ورځ لسګونه انسانان وژل کېږي. په همدې تړاو لا هم د کابل په ځینو برخو کې لاریونونه روان دي. لاریون کوونکو د کابل د دولتي پوهنتونو دروازې هم د محصیلیونو پر مخ تړلې دي. د بلخ په مرکز مزار شریف ښار کې هم لاریون شوی دی او له حکومت غوښتل شوي چې د خلکو امنیت ته جدي توجه وکړي. بل پلو د غزني ښار لسګونه اوسېدونکو هم نن ددغه ښار په مرکز کې لاریون کړی او له حکومت غواړي چې په جاغوري او مالستان کې روانه جګړه کابو کړي. د پوځ لوی درستیز محمد شریف یفتلي بیا نن، په یوه خبري غونډه کې وویل، چې په مالستان کې کافي سرتيري موجود دي او د جاغوریو د امنیت لپاره تازه دمي سرتېري لېږل شوي دي. هغه وايي د غزني ښار او ددغه ولایت د ولسوالیو د امنیت ښه والي لپاره جدي هڅې پيل شوې دي او افغان ځواکونه له مخالفو وسله والو ډلو سره په جګړه بوخت دي، چې ژر تر ژره به جګړې کابو کړي.