روسیه: طالبان د مسکو په دویمه غونډه کې هم ګډون کوي

د روسیې د بهرنیو چارو وزارت وایي، طالبانو د افغان سولې په اړه د مسکو په دویمه غونډه کې د ګډون لپاره خپل چمتوالی ښودلې دی. د مسکو لومړۍ ناسته چې تېره اوونۍ په مسکو کې جوړه شوې وه پکې د سیمه ییزو هېوادونو د استازو سربېره د طالبانو یو پنځه کسیز پلاوي هم ګډون کړی وو. افغان حکومت په یاده ناسته کې له ګډون کولو نه په شا شو او لامل یې دا بللی چې دوی غواړي له طالبانو سره د افغانانو په مشرۍ د سولې خبرې مخته یوسي، خو طالبانو بیا په یاده غونډه کې یو ځل بیا ټینګار وکړ چې دوی له افغان حکومت سره ځکه خبرې نه کوي چې هغوی صلاحیت نه لري، خو په خبره یې له امریکا سره خبرو ته چمتو دي. د مسکو د دویمې غونډې د څرنګوالي او نیټې په اړه څه نه دي ویل شوي.