د روسیې د ار ټي ټلویزیوني شبکې د خبر له مخې ښایي د افغان سولې لپاره د امریکا ځانګړی استازی زلمی خلیلزاد د خپل سفر لوری مسکو ته بدل کړي.
سرچینې د روسیې د بهرنیو چارو وزارت په حواله خبر ورکړی چې خلیلزاد پلان لري پر افغان سوله د خبرو لپاره مسکو ته ورشي.
سرچینې د ضمیر کابلوف له قوله لیکلي، دی خلیلزاد له نږدې پېژني او دوی به په دې لیدنه کې پر افغان سوله مفصلې خبرې وکړي.
خلیلزاد اوس په کابل کې دی او دلته یې له سیاسي څېرو او چارواکو سره هم د افغان سولې په اړه خبرې اترې کړې دي. خلیلزاد وروسته تر هغه روسیې ته سفر کوي چې تېره اونۍ په روسیه کې د افغان سولې په تړاو جوړه شوې غونډه کې طالبانو ټینګار وکړ چې دوی غواړي مخامخ له امریکا سره خبرې وکړي او لومړۍ غوښتنه یې له دې هېواده د بهرنیو ځواکونو وتل دي.
دا په داسې حال کې ده چې په دې وروستیو کې ورځ تر بلې پر افغان خاوره د حکومت د کنټرول ساحه تنګېږي او طالبان پرله پسې هڅه کوي پر ولسوالیو ولکه ټینګه کړي.
امریکا تر اوسه روسیې ته د خلیلزاد د سفر په اړه څه نه دي ویلي.
بل پلو د روسیې د بهرنیو چارو وزارت وایي، طالبانو د افغان سولې په اړه د مسکو په دویمه غونډه کې د ګډون لپاره خپل چمتوالی ښودلی دی.
د مسکو په لومړۍ ناسته کې چې تېره اونۍ په مسکو کې جوړه شوې وه د سیمه ییزو هېوادونو د استازو سربېره د طالبانو یو پنځه کسیز پلاوي هم ګډون کړی و.
افغان حکومت په یاده ناسته کې له ګډون کولو نه په شا شو او لامل یې دا بللی چې دوی غواړي له طالبانو سره د افغانانو په مشرۍ د سولې خبرې مخته یوسي، خو طالبانو بیا په یاده غونډه کې یو ځل بیا ټینګار وکړ چې دوی له افغان حکومت سره ځکه خبرې نه کوي چې هغوی صلاحیت نه لري. طالبانو وويل چې له امریکا سره خبرو ته چمتو دي. د مسکو د دویمې غونډې د څرنګوالي او نېټې په اړه څه نه دي ویل شوي.
