سرچينې وايي چې په فراه کې تر ٣٠ ډېر پوليس وژل شوي او شاوخوا لس نور طالبانو نيولي، خو طالبان بيا وايي چې ٤٦ دولتي سرتېري يې وژلي دي.
د فراه د ولايتي شورا غړي حاجي خيرمحمد نورزي پژواک ته ويلي چې وسله والو طالبانو وړمه شپه د دغه ولايت د خاکسفيد ولسوالۍ په خوست سيمه کې د سيمه ييزو پوليسو پر پوستو بريدونه وکړل.
دى وايي چې په دغو بريدونو کې تر شلو ډېر سيمه ييز پوليس وژل شوي دي.
هغه وويل چې طالبانو په دې سيمه کې يو شمېر سيمه ييز پوليس ژوندي هم نيولي، خو له ده سره يې کره شمېر نشته.
دا په داسې حال کې ده چې د ځينو نا تاييد شوو راپورونو له مخې، په خاکسفېد کې تر دې ډېرو دولتي ځواکونو ته مرګ ژوبله اوښتې ده.
د فراه د والي وياند ناصر مهري وايي چې وړمه شپه د خاکسفېد په خوست سيمه کې نښتې شوې، خو دى يې د مرګ ژوبلې په اړه معلومات نه لري.
نوموړی د جزياتو له ورکولو پرته وايي چې طالبانو وړمه شپه د فراه ښار د مرکز اړوند په باغ پل، سنګي زور، برنګتوت او حيدرقلي سيمو کې هم بريدونه کړي، خو د مرګ ژوبلې په اړه يې له ده سره معلومات نشته.
د يادو سيمو اوسېدونکي چې نه غواړي نوم يې څرګند شي، وايي چې وړمه شپه د باغ پل په سيمه کې د پوليسو يوه پوسته طالبانو ونيوه او د دې پوستې اته پوليس يې له ځان سره بوتلل.
هغوى وايي چې د برنګتوت په سيمه کې دوه پوليس وژل شوي او درې نور طالبانو نيولي دي.
خو د فراه د والي وياند ناصر مهري وايي چې د فراه په مرکز کې د طالبانو د وړمې شپې په بريدونو کې دوه پوليس په برنګتوت او دوه نور په باغ پل کې وژل شوي دي.
يوه سرچينه چې نه غواړي نوم يې څرګند شي، وايي چې طالبانو د دغه ولايت په ګلستان ولسوالۍ کې هم د سيمه ييزو پوليسو پر پوستو بريدونه کړي چې په پايله کې يې شپږ پوليس وژل شوي دي.
مهري د ګلستان په اړه څه ونه ويل، خو وايي چې د فراه په بريدونو کې طالبانو ته هم مرګ ژوبله اوښتې، خو کره شمېره يې ورسره نشته.
طالبانو ويلي چې وړمه شپه په خاکسفېد او ګلستان ولسواليو او دغه راز د فراه په مرکز کې د هغوى په بريدونو کې له دولتي ځواکونو څخه ٤٦ تنه وژل شوي، نهه ټپيان دي او نهه نور طالبانو ژوندي نيولي دي.
طالبانو ويلي چې په دغو بريدونو کې یو طالب وژل شوى او درې نور ټپيان دي.
