پر ایران د امریکا له تازه بندیزونو وروسته په افغانستان کې هغه سیمي هم د نا امنه کېدو له ګواښ سره مخ دي چې امریکا یې د خپل ماموریت په دوره کې د افغانستان په کچه تر ټولو امن سیمې ګڼي.
طالبانو په تېرو ۱۷ کلونو کې د لومړي ځل لپاره پر هزاره مېشتو سیمو بریدونه پیل کړي او یو شمېر سیمې یې سقوط کړې دي.
دغه بريدونه د اروزګان له خاص اروزګان ولسوالۍ پيل شول او د غزني جاغوريو او مالستان ولسواليو ته وغځول شول.
د چارو شنونکي وايي، پر ایران د امریکا له بندیزونو وروسته ایران هڅه کوي د طالبانو له لارې په افغانستان کې هغه سیمي نا امنه کړي چې د امریکا له خوا امن سیمې ګڼل کېږي او د دوی لپاره یو امتیاز دی.
د چارو شنونکی حامد مصباح وايي، د واشنګټن او تهران ترمنځ وروستۍ شخړې په افغانستان کې د ایران د مداخلې سبب شوې دي.
مصباح پر دې باور دی چې په خاص اروزګان، جاغوريو او مالستان کې د طالبانو وروستي بريدونه هم د امريکا د بنديزونو پر وړاندې د ايران غبرګون دی.
د چارو شنونکي وايي، له دې وړاندې په هزاره مېشتو سیمو کې د یوه توافق له مخې وسله والو طالبانو له وسلو پرته په ازاد ډول تګ – راتګ او درملنه کوله، خو پر ایران د امریکا له بندیزونو وروسته د طالبانو جنګي ستراتېژي بدله شوې ده.
طالبانو د یوې اعلامیې په ترڅ کې ویلي چې ددوی جګړه د کوم قوم او مذهب د خلکو خلاف نه ده، بلکې دوی پر ټولو هغو سیمو عملیات کوي چې هلته حکومت او بهرنیان مسلط دي.
په ملي شورا کې د غزني استازي او د دغه ولایت قومي مشران وايي چې جګړه د غزني ولایت د مرکز څنډو ته رسېدلې او که حکومت یې په تړاو په وخت سره اقدام ونه کړي، غزني به یو ځل بیا له سقوط سره مخ شي.
د ولسي جرګې غړی علي عليزاده وايي چې وړمه شپه هم په سلګونو طالب جنګيالي د جګړې لپاره د جاغوريو شاوخوا سيمو ته رسېدلي او سختې جګړې ته چمتووالی نيسي.
د هزاره مېشتو سیمو په تړاو د طالبانو په سیاست او ستراتېژۍ کې دا تغیر داسې مهال دی چې متحده ایالاتو پر ایران تازه بندیزونه لګولي او دغه هېواد هم له وسله والو طالبانو سره خپلې اړیکې تر پخوا زیاتې او پراخې کړې دي.
پر ايران د امريکا بنديزونه له دې کبله دي چې له يوې خوا خو ايران خپل اټومي پروګرام نه دی محدود کړی او له بلې خوا تهران د سيمې، په ځانګړي ډول منځني ختيځ، په چارو کې لاسوهنه کوي.
