والستریت ژورنال: امریکا د افغانستان د ولسمشریزو ټاکنو پر ځنډولو غور کوي

ښايي امریکا له افغان حکومت وغواړي چې راتلونکې ولسمشریزې ټاکنې وځنډوي. والسټریټ ژورنال ورځپاڼې د امریکا په حکومت کې د خپلو سرچینو له خولې لیکلي، د امریکا حکومت پر دې فکر کوي، چې د راتلونکي کال ټاکنو د ځنډولو په موخه پر افغان حکومت فشار واچوي او کنه. د سرچینې په خبره امریکا غواړي چې د افغانستان د سولې مسئله یوې پایلې ته ورسېږي او تر هغه وروسته ټاکنې ترسره شي. والسټرېټ ژورنال لیکي د امریکا حکومت وېره لري چې د افغانستان ټاکنې به د سولې په پروسه کې ستونزې رامنځ ته کړي نو له همدې امله پر دې غور کوي چې دغه ټاکنې وځنډول شي. په مطلب کې راځي چې د امریکا حکومت جدي توګه غواړي د افغانستان ستونزه د خبرو او مذاکراتو له لارې حل شي او زلمي خلیلزاد ته یې دنده سپارلې چې له ټولو ممکنو لارو د افغان جګړې د حل په برخه کې کوښښ وکړي. تر دې وړاندې هم داسې ګنګوسې وې، چې ښایي د راتلونکي کال ولسمشریزې ټاکنې د سولې د مذاکراتو لپاره وځنډول شي. د ټاکنو خپلواک کمیسیون هم څو ځله د ولسمشریزو ټاکنو د مهالوېش اعلانولو خبره وکړه، خو تر دې دمه یې نه دی اعلان کړی.