د چین، پاکستان او افغانستان ګډه غونډه؛ د افغانستان د سولې او پرمختګ په برخه کې باید هڅې ډېرې شي

د چین-افغانستان-پاکستان ډیالوګ د څلورمې ګډې غونډې ګډونوالو پر سولې، پراختیا او اقتصادي همکاریو ټینګار کړی دی. د یادو دریو هېوادونو څلورمه ګډه غونډه پرون جوړه شوې وه او ددغه غونډې ګډونکوونکو ویلي چې باید د سولې په برخه کې د درېواړو هېوادونو ترمنځ همکارۍ ډېرې شي. دوی ټینګار وکړ، چې پخپلو کې باید اقتصادي اړیکې سره پراخې کړي او د پراختیا او پرمختګ لپاره ګډ کارونه وکړي. د پاکستان استازي مشاهد حسین ویلي چې د سیمې د پرمختګ او امنیت لپاره د افغانستان سوله او ثبات مهم دی او د سیمې هېوادونه باید دغه هېواد ته امن راولي. دده په خبره پاکستان او چین پرېکړه کړې چې د سیپیک په ستره پروژه کې افغانستان شریک کړي او دا به د افغانستان د اقتصادي پرمختګ سبب شي. په اسلام اباد کې افغان سفیر عمر زاخېلوال غونډې ته ویلي، چین، پاکستان او افغانستان طبیعي اتصال سره لري او د درېواړو هېوادونو ترمنځ د اړیکو پراختیا به په سیمه کې د اقتصادي انقلاب سبب شي. هغه غوښتي چې د سیمې هېوادونه په رښتینې توګه د افغانستان په ثبات او سوله کې همکاري وکړي.