لسګونه کسان؛ د ټاکنیزو جرمونو په تور لویې څارنوالۍ ته معرفي شوي دي

د ټاکنیزو شکایتونو خپلواک کمیسیون ویلي چې دوی لسګونه کسان چې په ټاکنیزو جرمونو ککړ وو، لویې څارنوالۍ ته معرفي کړي دي. په دې ډله کې ولسوالان، نوماندان، د ټاکنو کمیسیون کارکوونکي، پولیس، ناظرین او عادي خلک شامل دي. ددغه کمیسیون غړي غلام دستګیر هدایت ویلي، دغه کسان په بېلو جرمونو لکه، په صندقونو کې لاسوهنه، مرکزونو ته ناظرینو نه پرېښودل، تقلب او نورو ورته غیر قانوني فعالیتونو تورن دي. هغه وايي چې ۸۶ کسان یې له دوسیو سره لویې څارنوالۍ ته سپارلي دي. د هدایت په وینا تر اووه زره ډېر شکایتونه دغه کمیسیون ته شوي دي او دوی یې په څېړلو لګیا دي.