امریکا: ولسمشرۍ ټاکنو کې د احتمالي تغییراتو واک یواځې افغان حکومت لري

د امریکا د بهرنیو چارو وزارت وایي، د افغانستان د ولسمشرۍ ټاکنو نیټه افغان حکومت ټاکي او دوی به په دې پروسه کې هیڅ ډول لاسوهنه ونه کړي. د امریکا د بهرنیو چارو وزارت ویانده هیدر نایورټ دا څرګندونې وروسته تر هغه کوي چې ویل کېږي امریکا هڅه کوي د افغانستان ولسمشریزې ټاکنې وځنډوي. هغې ویلي د افغانستان په ولسمشریزو ټاکنو کې د هر ډول احتمالي تغیراتو واک افغان حکومت لري نه واشنګټن. دا په داسې حال کې ده چې وړاندې تر دې وال سټریټ ژورنال ورځپاڼې راپور ورکړی و چې ټرمپ هڅه کوي افغان حکومت د ولسمشریزو ټاکنو پر ځنډولو راضي کړي، خو افغان حکومت په وار وار دا خبرونه رد کړل. ولسمشر غني او عبدالله عبدالله دواړو ویلي چې د افغانستان د ولسمشرۍ ټاکنې به پر وخت په شفافه توګه تر سره شي. دوی ویلي په دې اړه خپاره شوي راپورونه حقیقت نه لري او دوی به د هیچا په خوښه ولسمشریزې ټاکنې ونه ځنډوي.