سرچینه: ارزګان کې ۱۰ سرتېري او ۱۵ طالبان وژل شوي

ارزګان کې پر امنیتي پوستو د وسله والو طالبانو په بريد کې ۱۵ امنیتي سرتېرو ته مرګ ژوبله اوښتې ده. د یاد ولایت د ولايتي شورا مرستيال محمد کريم کريمي وويل چې تېره شپه وسله والو طالبانو د ترينکوټ ښار اړوند د پاى ناوې په سيمه کې د ملي اردو او پوليسو پر ګډې قرارګاه او پوستو بريدونه کړي چې په پایله کې یې دواړو لوریو ته مرګ ژوبله اوښتې ده، خو نوموړي یې په اړه کره معلومات نه درلودل. په روته وخت کې د دې ولايت يوې امنيتي سرچينې د نوم نه ښودو په شرط وويل، چې په دې نښته کې د ملي اردو او پوليسو ١٠ سرتېري وژل شوي او ٥ نور ټپيان دي. د سرچينې په وينا، دغه راز په ځوابي بريدونو کې تر ١٥ پورې وسله وال طالبان هم وژل شوي او تر دې ډېر نور ټپيان دي. طالبانو خپل لورې ته د اوښتې مرګ ژوبلې په اړه څه نه دي ویلي خو په خبره یې قرارګاه او پوستو ته يې سقوط ورکړى او ٣١ سرتېرو ته يې مرګ ژوبله اړولې ده.