د افغان جګړې د ختمولو لپاره جدي هلې ځلې په کار دي

چینا ډاټ اورګ په یوه اوږده مطلب کې لیکي د افغانستان جګړه د ټولې سیمې د نارامۍ سبب شوې ده او ددې اړتیا ده، چې د ختمولو لپاره یې هلې ځلې ډېرې شي. به مطلب کې راځي، امریکا باید په دې ځان پوه کړي چې په افغانستان کې له نظامي لارو دغه بحران نه شي ختمېدلی او یوازې سیاسي مذاکرات دي چې افغان جګړه ختموي. همدا راز وړاندې کاږي، نظرپوښتنې دا ښيي چې په برېتانیا او امریکا کې هم ملکیان په افغانستان کې د خپلو هېوادونو د پوځيانو له جګړو راضي نه دي او له دوی غواړي چې خپلو مېنو ته ستانه شي. چینا ډاټ اورګ وړاندې لیکي، چې د افغان ستونزې د حل لپاره د روسیې، چین، پاکستان او ایران په ګډون یو نوی بلاک هم رامنځ ته کېدونکی دی، چې دوی به هڅه وکړي د افغانستان د ستونزې حل پيدا کړي. سرچینه زیاتوي، د افغانستان په مسئله کې پاکستان تر ټولو ډېر ښکېل دی خو چین دا هڅه پيل کړې څو دغه هېواد قانع کړي چې د افغانستان په ثبات او سوله کې تر بل هر چا د پاکستان ګټه ډېره ده.