سعودي عربستان: د افغانستان د سولې په برخه کې هر ډول همکارۍ ته تیار یو

د افغانستان، سعودي عربستان، اماراتو او امریکا استازو د افغان سولې په اړه خبرې کړې دي. د سعودي عربستان د بهرنیو چارو وزارت له لوري په خپره شوې خبرپاڼه کې راغلي، چې یادو څلورو واړو لورو په ابوظبي کې د افغان سولې په اړه خبرې کړې دي. سعودي عربستان ژمنه کړې چې افغانستان ته د سولې د راتګ په برخه کې خپلې همکارۍ نه سپموي. سرچینه زیاتوي د سعودي شاهي حکومت په افغانستان کې د جګړو ختمېدو او سولې راتګ ته ژمن دی او په دې برخه کې د ښکېلو اړخونو ترمنځ د سیاسي مذاکراتو او سولې د خبرو ملاتړ کوي. خبرپاڼه زیاتوي چې په دې خبرو کې د افغان سولې په اړه د امریکا ځانګړی استازی زلمی خلیلزاد هم حاضر و او ددغه لیدنې له پایلو راضي و.