قطر ته د امریکايي استازي زلمي خلیلزاد په راتلونکي سفر کې به هغه له طالبانو وغواړي چې د امریکايي پوهنتون دوه تښتول شوي استادان خوشې کړي. سپوږمۍ راډیو ته یوې باوري سرچینې وویل چې د ملا برادر او څو نورو طالب بندیانو له خوشې کېدو وروسته به خلیلزاد له طالبانو وغواړي چې دغه دوه استادان د حسن نیت په خاطر خوشي کړي او طالبان به هم دا غوښتنه ومني. امریکايی یوین کینګ او استرالیایی ټیموټي ویکس چې د امریکايي پوهنتون استادان وو، څه باندې دوه کاله مخکې د وسله والو له خوا د کابل له دار الامان سیمې وتښتول شول او وروسته طالبانو وویل چې دا استادان دوی تښتولي دي. د امریکايي پوهنتون چارواکو ویلي وو چې دا کار حقاني شبکې کړی او په بدل کې یې د انس حقاني د خوشې کولو غوښتنه کوي. هغه وخت د طالبانو غوښتنه نه وه منل شوې، خو اوس ویل کیږي چې خلیلزاد به طالبانو ته له دې ګام وروسته د انس حقاني د خوشې کولو ډاډ هم ورکړي.
ټاکل شوې چې خلیلزاد ډېر ژر قطر ته ولاړ شي او له هلته له طالب استازو سره یو ځل بیا وګوري.
