د ولسمشرۍ ټاکنو د مهالوېش اعلان ځنډول شوی دی

د ټاکنو خپلواک کمیسیون وایي چې د یو جامع مهالوېش د اعلانولو لپاره لا هم له بیلابیلو اړخونو سره په سلا مشورو بوخت دي. ټاکل شوې وه چې د ټاکنو خپلواک کمېسیون په روانه اونۍ کې د ولسمشرۍ انتخاباتو مهالوېش اعلان کړي، خو د یاد کمېسیون د ویاند مرستیال ذبیح‌ الله سادات وویل چې د راتلونکو ټاکنو د امنیت، بودجې او ورته نورو امکاناتو د برابرولو لپاره، له افغان حکومت، سیاسي ګوندونو، د ټاکنو څار بنسټونو او مدنې ټولنو سره بحثونه دوام لري. د سادات په خبره، کمېسیون په راتلونکې کې څو ټاکنې عملي کوي او له همدې امله د دغو ټاکنو د مهالوېش اعلان زیات دقت ته اړتیا لري. له دې وړاندې د لړم په ۱۹مه د ټاکنو کمېسیون رییس عبدالبدیع صیاد خبریالانو ته ویلي وو، چې د راتلونکو ټاکنو مهالوېش به په دوه درې ورځو کې اعلان کړي. دا په داسې حال کې ده چې ویل کېږي امریکا هڅه کوي افغان حکومت د ټاکنو پر ځنډولو راضي کړي.