حکمتیار: له یو شمېر حزبونو سره په توافق پر یو ټکټ ولسمشرۍ ټاکنو ته ځو

د حزب اسلامي مشر ګلدین حکمتیار ویلي چې له ځینې سیاسي حزبونو سره هوکړې ته رسېدلی دی څو په یو انتخاباتي ټکټ راتلونکو ولسمشریزو ټاکنو ته نوماند ورکړي. نوموړي چې نن یې په یوه خبري غونډه کې خبرې کولې وویل، له یو شمېر سیاسي حزبونو سره یې له مشورو وروسته دا پرېکړه کړې چې راتلونکو ولسمشریزو ټاکنو ته به له یو ادرسه یو نوماند ورکړي. حکمتیار ویلي چې په دې حزبونو کې، د محقق په مشرۍ د حزب وحدت اسلامي مردم ګوند، د کریم خلیلي په مشرۍ د حزب وحدت اسلامي ګوند، جنبش ملي، محاذ ملي، افغان ملت او نور ګوندونه شامل دي. نوموړي په خپلو خبرو کې پر ټاکلې نېټه د ولسمشرۍ ټاکنو پر تر سره کېدو ټینګار کړی دی. هغه د ټاکنو خپلواک کمیسیون د ولسي جرګې په تېرو ټاکنو کې په بې کفایتۍ تورن کړی او تر سره شوې ټاکنې یې له درغلۍ ډکې بللې دي. دغه راز نوموړي د جمعیت ګوند له مشر صلاح الدین رباني سره خپلې لیدنې ته په اشارې ویلي چې دوی د صدارتي نظام د طرحې په وړاندې کولو سره غواړي د تاجک قوم حقوق یواځې خپل ګوند پورې منحصر کړي چې د نوموړي په خبره، د هغوی دا پرېکړه د قومونو تر منځ نا انډولۍ ته لاره هواروي.