د پکتیکا یو شمېر قومي مشرانو او مخورو د یوې غونډې په ترڅ کې له حکومت نه د ړندو هوایي بریدونو د مخنیوي غوښتنه کړې ده. د پکتيکا د ګيان ولسوالۍ قومي مشرانو د يوې اعتراضي غونډې په ترڅ کې ويلي، حکومت بايد د هغو هوايي بريدونو مخه ونيسي چې په کې ملکي وګړو ته مرګ ژوبله اوړي. شاوخوا دوه اوونۍ مخکې په ګيان ولسوالۍ کې د هوايي بريدونو له امله د ښځو او ماشومانو په ګډون ١٢ ملکي وګړي ووژل شول او ١٢ نور ټپيان شول. د يادې موضوع په غبرګون کې د ګيان ولسوالۍ قومي مشرانو نن د پکتیکا په مرکز ښرنه کې اعتراضي غونډه جوړه کړې وه. د پکتيکا مرستيال والي شېر بادشاه اورګوني بیا وويل چې د دغه ډول عملياتو پلانونه په کابل کې جوړېږي او سيمه ييزو چارواکو ته يې په اړه معلومات نه ورکول کېږي، خو په خبره یې دوی په دې برخه کې خپلې هڅې جاري وساتي. د يادونې ده، تېر کال هم د ګيان ولسوالۍ يو شمېر اوسېدونکي د هوايي بريدونو له امله وژل شوي وو.
قومي مشران: حکومت دې د ړندو هوایي بریدونو مخنیوی وکړي
Get real time update about this post categories directly on your device, subscribe now.
- Trending
- Comments
- Latest
