لانګ وار: مسکو هڅه کوي ځان د افغان سولې اتل وښیي

د بریټانیا د حاکم ګوند یوه غړي د افغان سولې په برخه کې د مسکو له هڅو د هرکلي تر څنګ ویلي چې یاد هېواد غواړي په افغان مساله کې د مداخلې له لارې یو ځل بیا پر افغانستان د شوروي د یرغل د وخت جنایت تکرار کړي. د لانګ وار په نامه پر یوې ویبپاڼه د بریټانیا د حاکم ګوند د یوه غړي د خپرې شوې مقالې له مخې، روسیه هڅه کوي د افغانستان په مساله کې ځان منځګړی کړي او په دې سره ښیي چې د سولې اتلان دوی دي، په داسې حال کې چې دوی د شوروي د یرغل پر مهال په افغانستان کې په زرګونه جنایتونه کړي دي او په اخیر کې یې د وخت حاکمان هم مخالفینو ته یواځې پرېښي چې تر دې ستر جنایت نشته. د سرچینې په خبره مسکو اوس هم له هغو کسانو ملاتړ کوي چې د افغانستان په ورانۍ کې لاس لري او د دوی د جګړو او مزاحمتونو له امله په زرګونو خلک وژل شوي په زرګونو ټپیان او په لکونو نور بیا د خپلو مېنو پرېښودو ته اړ شوي دي. د سرچینې په خبره له وسله والو طالبانو د روسیې د ملاتړ موخه د هغې بریا خوب دی چې دوی کلونه پخوا لیدلي وو. دا په داسې حال کې ده چې څه موده وړاندې په مسکو کې د افغان سولې په تړاو غونډه وشوه چې پکې د طالبانو پنځه کسیز پلاوي له افغانستان د بهرنیو ځواکونو پر وتلو ټینګار وکړ.