ولسمشر غني ته د امریکا د بهرنیو چارو وزیر انتوني بلېنکن له لیک وروسته داسې ښکارېږي چې حکومت د امریکا له بې ساري فشار سره مخ شوی دی. پرون د ولسمشر د لومړي مرستیال امرالله صالح له څرګندونو ښکارېدله، چې دوی له څومره فشار سره مخ دي. تر ګردو مهم او اساسي فشار دا دی چې دوی باید واک د سولې انتقالي حکومت ته وسپاري، له همدې امله په کابل کې چارواکي تر بل هر وخت ډېر له ناوړه حالت سره مخ شوي دي.
خو چارواکي د امریکايي پرېکړو پر وړاندې مقاومت کوي او کولی یې شي؟
تر اوسه خو داسې ښکاري چې چارواکي نه یوازې د امریکا له وروستیو هلو ځلو ناراضه دي، بلکې هڅه کوي چې پر وړاندې یې نرم مقاومت وکړي او تر یوې اندازې خپلې ګټې خوندي کړي. د دوی دریځ تر ډېره پخوانی دی، خو اوس یو څه بدل شوی؛ ځکه چې پخوا به اشرف غني د واک د پوره کېدو او نوي ولسمشر ته د واک سپارلو خبره کوله، خو اوس وايي چې له وخت مخکې ټاکنو ته هم حاضر دی. دوی اوس غواړي چې لږ تر لږه واکمني یې یو څه وغځېږي او په راتلونکي کې هم ځان ته په واک کې د پاتې کېدو زمینه برابره کړي. د امرالله صالح څرګندونې د همدې مقاومت یوه نښه ده، چې ګواکې دوی حاضر نه دي چې هر څه ومني. که څه هم امرالله صالح د طالبانو د نه منلو خبره کوي، خو په واقعیت کې د امریکا له طرحې سره مخالفت څرګندوي.
ستونزه دا ده چارواکي لا هم باور نه لري چې امریکا به یې یو مخ پرېږدي. دوی فکر کوي چې له امریکا سره د دوی پخوانۍ اړیکې، امریکایانو ته د دوی کړی خدمت او له طالبانو سره د امریکا شل کاله جګړه به د دې سبب شي، چې امریکا له دوی مخ وا نه ړوي او له طالبانو سره به سوله ونه کړي. د دوی نرم مقاومت هم داسې نه دی، چې وښيي دوی د امریکا پر وړاندې ولاړ دي او د هغوی د پرېکړو مخالفت کوي، بلکې دوی فکر کوي چې لا هم امریکا په خپل دریځ کې جدي نه ده او د دوی د دوستۍ پاس به ساتي. له همدې امله بیا بیا داسې ښيي چې ګواکې دوی خپلواک دي او د امریکا طرحې او پلانونه نه مني.
له دې هر څه سره سره، ښکاري چې امریکا د افغانستان جګړه ختموي یا یې لږ تر لږه د ځان لپاره ختموي او له طالبانو سره د سولې پروسه مخ ته بیايي. دا چې د امریکا موخه څه ده، ښايي درک کول یې ستونزمن وي، خو غواړي چې د سولې پروسه بریالۍ کړي. که طالبان او نور اړخونه د امریکا وروستۍ طرحه ومني، نو هرو مرو به دا طرحه عملي کېږي. دا شونې نه ده چې په کابل کې چارواکي داسې مقاومت وکړي چې د امریکا د طرحې د عملي کېدو مخه دې ونیسي؛ ځکه چې له یوه اړخه دوی دا اراده او توان نه لري او له بله اړخه یې په ولس کې هم داسې باور بایللی، چې خلک به یې تر څنګ ونه درېږي. له همدې امله د امریکا طرحه عملي کېږي او چاوراکي به د تېر په څېر بیا هم خپل دریځ بدلوي او نوو بدلونونو ته به توجیه پیدا کوي.
