د امریکا د بهرنیو چارو وزیر لیک او د سولې لپاره د انتقالي حکومت طرحې په کابل کې چارواکي وارخطا کړې دي. دوی نه پوهېږي چې څنګه غبرګون وښيي او څه وکړي. له همدې امله وېره ده چې د دوی دریځ به ستونزې لا زیاتې کړي. دې حالت په حکومت کې دننه د ارګ او د سولې عالي شورا ترمنځ هم واټن پیدا کړی دی. د سیاستوالو او حکومت ترمنځ واټن خو لا پخوا و. له همدې امله د معقول او سم دریځ شونتیا نشته.
د امریکا له خوا د انتقالي حکومت طرحې ته غبرګون او په دې اړه د پرېکړې لپاره پکار ده، چې په کابل کې چارواکي او سیاستوال سره یوه خوله وي او داسې دریځ خپل کړي چې له سولې سره مرسته وکړي او د افغانستان ګټې خوندي کړي. دا چاره به د افغان لوري دریځ پیاوړی کړي او ممکنه خطرونه به را کم کړي.
تر اوسه پورې د سولې په پروسه کې اساسي ستونزه دا ده، چې د ولس او حکومت، سیاستوالو او چارواکو او آن د حکومت په منځ کې اختلافات دي. د سولې پروسه اوس حکومتي چارواکي د خپل شخصي واک او ځواک د خوندیتوب له زاویې ګوري. دوی د سولې هره هڅه له دې امله تخریبوي چې د دوی واکمني وغځېږي. سیاستوال بیا په دې هڅه کې دي، چې د سولې پروسه دوی بیا په قدرت کې ورګډ کړي. دوی د دې لپاره هڅه کوي، چې داسې یو جوړښت رامنځ ته شي چې بیا پکې واک ووېشل شي او دوی ته هم پکې ونډې ورسېږي. له بده مرغه حکومت او سیاستوال دواړه د دې پر ځای چې سولې ته د ولس د هیلې او غوښتنې په سترګه وګوري، یوازې د خپلو شخصي ګټو او قدرت له زاویې ورته ګوري.
په حکومت کې دننه او د حکومت او سیاستوالو ترمنځ اختلاف د دې سبب شوی، چې هم د سولې په پروسه کې خنډ او ځنډ پېښ شي او هم داسې بدلونونه راشي چې راتلونکی یې له ګواښ سره مخ کړی. د حکومتي چارواکي د واک غوښتنې هڅې د سولې پروسه شاوخوا یو کال وځنډوله چې له امله یې زرګونه افغانانو ته مرګ ژوبله واوښته. اوس هم د سولې هرې هڅې ته له همدې زاویې ګوري. د امریکا د بهرنیو چارو وزیر لیک او د سولې د انتقالي حکومت طرحې ته یې هم غبرګون له همدې زاویې دی. سیاستوال هم هڅه کوي چې په ګډوډۍ کې د ځان ګټې خوندي کوي، ځینې یې د حکومت له خوا امتیازات اخلي او تر څنګ یې ودریږي او ځینی بیا د حکومت په مخالفت کې دي او د هرې هغې هڅې هرکلی کوي، چې حکومت له پښو غورځوي.
د سولې د وروستیو هڅو او د امریکا د طرحې په اړه باید یوه ملي اجماع رامنځ ته شي. یا لږ تر لږه د سیاستوالو او حکومت یو واحد غږ پیدا شي. دا غږ باید معقول او د سولې او افغانستان په ګټه وي. حکومتي چارواکي باید ومني چې نور یې وخت ختم دی او سوله حتمي راځي. دوی باید د واک پر ځای د سولې لپاره کار وکړي. سیاستوال هم باید درک کړي، چې سوله تر ګردو مهمه ده او دوی باید واک ته د را ګرځېدو لپاره هر څه ته لاس وانه چوي. له همدې امله یو ګډ او سم دریځ پکار ده چې له بده مرغه تر اوسه پورې نشته.
