پخوانی امریکایي چارواکی: امریکا باید له افغانستانه د وتلو ابرومندانه لار پیدا کړي

د امریکا د دفاع وزارت پخوانی مرستیال وایي، امریکا باید تر دې حده ونه رسېږي څو د سفارت له بامه په الوتکه کې را وتښتي نو غوره ده له افغانستانه د وتلو لپاره ابرومندانه لارې چارې ولټوي. دا څرګندونې سپوټنیک اژانس د ځینو امریکایي رسنیو په حواله د امریکا د دفاع وزارت د پخواني مرستیال بینګ ویسټ له خولې کړې دي. ویسټ ویلي چې په افغانستان کې د زرګونو امریکایي سرتېرو له وژل کېدو او میلیونونه ډالرو له مصرف وروسته باید امریکا هڅه وکړي څو د خپلې ابرو ساتلو لپاره له افغانستانه پښې سپکې کړي. هغه ویلي باید امریکایي چارواکي داسې لاره غوره کړي څو یو ځل بیا د ویتنام له برخلیک سره مخ نه شي. ویسټ زیاته کړې امریکا باید دومره مجبوره نه شي څو د الوتکې په واسطه په کابل کې د امریکایي سفارت له بامه را وتښتي. هغه ویلي طالبانو په وار وار ویلي چې دوی له امریکا سره پر افغان مساله خبرو ته چمتو دي خو د ټرمپ د دفاع وزیر په زور د دې جګړې ګټل غواړي په داسې حال کې چې په افغانستان کې د ناټو ځواکونو قومندان هم ټینګار کوي چې افغان جګړه نظامي حل نه لري. دا پخوانی امریکایي چارواکی دا څرګندونې داسې مهال کوي چې طالبانو په روسیه کې له افغانستانه د بهرنیو ځواکونو پر وتلو ټینګار کړی او ویلي یې دي څو چې بهرنیان په افغانستان کې وي دوی به خپلې جګړې ته دوام ورکړي.