ولسمشر غني: سولې ته رسېدل لوړې او ژورې لري باید ویې زغمو

ولسمشر غني د سولې په اړه د خپلو مشورتي ناستو په لړ کې نن له غرمې مخکې د مدني ټولنې له یو شمېر غړو سره کتلي دي. له ارګه د خپرې شوې خبرپاڼې له مخې په دې لیدنه کې ځوانانو د سولې په اړه خپل دقیق لیدلوري او وړاندیزونه مطرح کړل او له بېلابېلو اقشارو په ځانګړي ډول ځوانانو سره یې د ولسمشر غني له مشورو څخه په مننې وویل، اوس ځوانان د هېواد په مهمو پرېکړو کې ځانونه سهیم بولي. د سرچینې په وینا ولسمشر په یاده لیدنه کې ویلي، سوله ملي بحث دی او ارزښتونه یې یواځې افغانان تعریفولی شي. هغه زیاته کړه، افغانان باید روښانه اراده او لوری ولري او تېرې ترخې تجربې تکرار نه کړي. سرچینه کاږي ولسمشر ځوانانو ته ویلي، سولې ته رسېدل مسقیمه او هواره کرښه نه ده، په دې برخه کې باید لوړې او ژورې وزغمل شي. هغه ټینګار وکړ د سولې مذاکره کوونکی ټیم به د فرصت او ستونزې په هر پړاو کې له ملت سره مشوره وکړي. ولسمشر د سولې د بورډ خبره وروسته تر هغه کوي چې د راپورونو له مخې ښایي د سولې شورا منحل او پر ځای یې د سولې بورډ اعلان او خپل کارونه پیل کړي.